Qıtay Xalıq Respublikasınıń Sinczyan-Uyǵur avtonom rayonında ótkerilip atırǵan “The 11th China Xinjiang Seed Exhibition and Trade Fair 2026” (XI Qıtay-Sinczyan xalıqaralıq tuqımlar kórgizbesi hám sawda yarmarkası 2026) xalıqaralıq kórgizbesinde Ózbekstan Respublikası Awıl xojalıǵı ministrligi janındaǵı Tuqımgershilikti rawajlandırıw orayı óziniń ayrıqsha stendi menen qatnaspaqta.

Kórgizbede Oraydıń direktorı Shuhrat Otajonov basshılıǵındaǵı delegaciya qatnasıp, miymanlarǵa elimizdiń tuqımgershilik sisteması, perspektivalı sortlar, ámelge asırılıp atırǵan reformalar hám xalıqaralıq birge islesiw baǵdarları haqqında tolıq maǵlıwmat bermekte.

Kórgizbe dawamında Tuqımgershilikti rawajlandırıw orayınıń stendinde Ózbekstanda jaratılǵan awıl xojalıǵı eginleriniń tuqımları, tarawda ámelge asırılıp atırǵan innovaciyalıq joybarlar hám zamanagóy kózqaraslar kórsetilmekte.

Bul xalıqaralıq kórgizbe Ózbekstan hám Qıtay arasında bir neshe jıllardan berli izbe-iz rawajlanıp atırǵan tuqımgershilik tarawındaǵı birge islesiwdi jańa basqıshqa alıp shıǵıwǵa xızmet etedi.

Sawda-ekonomikalıq baylanıslardı keńeytiw, sapalı tuqımlıq ónimlerin almasıwdı jolǵa qoyıw, zamanagóy texnologiyalardı engiziw hám birgeliktegi joybarlardı ámelge asırıw boyınsha erisiletuǵın kelisimler eki mámleket arasındaǵı óz-ara paydalı birge islesiwdi bunnan bılay da bekkemlewge tiykar jaratadı.

Muhayyo Toshqoraeva, ÓzA