Qaraqalpaqstan Respublikası Básekilik komiteti tárepinen Tórtkúl rayonındaǵı «Burgutqal’a Saodati» fermer xojalıǵınıń múrájatı boyınsha úyreniwler ótkerildi.
Úyreniwler dawamında gazdiń jumsalıwın esaplawda gaz bólistiriw stanciyasında (GBS) ornatılǵan tiykarǵı esaplaǵıshtıń ornına shaqapshadaǵı ekinshi esaplaǵıshtıń joqarıraq kórsetkishleri tiykar etip alınǵanı anıqlandı. Nátiyjede, gaz kólemi jasalma túrde arttırıp esaplanǵan hám gaz uzatıw shólkeminiń esaplaǵıshı menen esaplanǵan kólem arasında 42149 kub metr ayırmashılıq payda bolǵan.
– Komitettiń qánigeleri tárepinen ótkerilgen úyreniwler dawamında ekinshi esaplaǵıshtıń kórsetkishleri tiykar etip alınıwı nızamshılıq talaplarına muwapıq emesligi, esaplaǵıshlar arasındaǵı ayırmashılıqqa gaz támiynatı shólkemi tárepinen jeterli texnikalıq yamasa metrologiyalıq tiykarlar berilmegeni hám bul jaǵday nátiyjesinde isbilermennen derlik 96 million sumnan aslam qarjı tiykarsız artıqsha óndirilgeni anıqlandı, – deydi Qaraqalpaqstan Respublikası Básekilik komitetiniń bas kánigesi Qurbanbay Seytmuratov. – Joqarıdaǵılarǵa bola, Komitettiń Arnawlı komissiyası tárepinen is qozǵatıldı.
Sonday-aq, anıqlanǵan nızambuzıwshılıqlardı saplastırıw hám fermer xojalıǵınan artıqsha esaplanǵan qarjını ıqtıyarlı túrde qayta esap-sanaq etip qaytarıw boyınsha orınlanıwı májbúriy bolǵan kórsetpe berildi.
«Hududgazta’minot» AJ tárepinen bul qarızdarlıq korporativ esap-sanaq sisteması arqalı qayta esaplap shıǵılıp, 96 million sumnan artıq qarjı «Burgutqal’a Saodati» fermer xojalıǵınıń paydasına sheshiliwi támiyinlendi.
Á.Jiyemuratov,
Qaraqalpaqstan xabar agentligi