Búgin Ózbekstan Respublikası Ilimler akademiyası Qaraqalpaqstan Respublikası filialı imaratı janında fotobioreaktorlı ekologiyalıq shertektiń ashılıw máresimi ótkerildi.
Bul Ózbekstan kóleminde ashılǵan qayta tikleniwshi energetika, biotexnologiyalar hám zamanagóy qala infrastrukturasın birlestirgen birinshi pilot kórgizbe obekti bolıp esaplanadı.
Bul joybar “Yuksalish” háreketiniń baslaması menen ámelge asırılıp, obektti joybarlastırıw, islep shıǵıw, tayarlaw hám ornatıw jumısları “Jas ilimpazlar akademiyası” JShJ qánigeleri tárepinen jergilikli ilimpazlardıń hám injenerlerdiń qatnasıwında orınlandı.
Joybardıń tiykarǵı elementi fotobioreaktor bolıp, onda Ózbekstan ilimpazları tárepinen ajıratıp alınǵan hám jergilikli klimat sharayatına beyimlestirilgen jergilikli mikroal shtammı jetistiriledi. Mikroalgalar quyash nurı, suw hám karbonat angidrid (SO2) járdeminde fotosintez procesin ámelge asırıp, kislorod hám biomassa payda etedi.
Kompleks tolıq avtonom túrde isleydi. Quyash panelleri islep shıǵaratuǵın elektr energiyası akkumulyatorlarda saqlanadı hám fotobioreaktor, suw aylanıw sisteması, aeraciya, jaqtılandırıw hám mobil qurılmalardı quwatlandırıw ushın jumsaladı.
Joybardıń tiykarǵı maqseti – jergilikli ilimiy qollanbalardı ámeliyatqa engiziw, ekologiyalıq texnologiyalardı ǵalaba en jaydırıw jáne qayta tiklenetuǵın energiya hám biotexnologiyalardı qala infrastrukturasında qollanıw imkaniyatların kórsetiw bolıp esaplanadı.
Bul obekt keleshekte mikroalgalardı jetistiriw texnologiyaların rawajlandırıw, ilimiy izertlewlerdi qollap-quwatlaw hám Ózbekstanda “jasıl” texnologiyalardı keńnen engiziw ushın kórgizbe maydanshası sıpatında xızmet etedi.
Á.Jiyemuratov,
Qaraqalpaqstan xabar agentligi