Elimizde sharwashılıqtı bunnan bılay da rawajlandırıw, sonıń ishinde, tarawda násilshilik hám ónimdarlıq kórsetkishlerin jaqsılaw, selekciya-násilshilik jumısların durıs jolǵa qoyıw, gósh hám sút jetistiriwdiń kólemin arttırıw, sonday-aq, tarawǵa zamanagóy texnologiyalar hám aldınǵı tájiriybelerdi keńnen engiziw baǵdarında bir qatar ilajlar ámelge asırılmaqta.
Onda Ózbekstan Respublikası Prezidentiniń “Sharwashılıq tarmaǵı hám jaylaw xojalıǵın zamanagóy basqarıw sisteması hám jańasha kózqaraslar tiykarında rawajlandırıw ilajları haqqında”ǵı qararı jáne tarawǵa tiyisli huqıqıy-normativlik hújjetler qollanba bolıp xızmet etpekte.
Bul hújjetlerdiń ámeldegi orınlanıwı boyınsha Ministrler Keńesi Baslıǵınıń birinshi orınbasarı F.Nurmuhammadov basshılıǵındaǵı Qaraqalpaqstan delegaciyası Qıtay mámleketine bardı. Sapar sheńberinde Qıtaydıń “Hualing Yecheng Agriculture and Animal Husbandry Development Co., Ltd.” JShJ hám “Wrta qala chorva mollari” JShJ arasında birge islesiw memorandumına qol qoyıldı.
Kelisim boyınsha úsh jıl dawamında Qaraqalpaqstanǵa 50 mıń bas násilli qaramal alıp keliniwi belgilengen. Joybardıń dáslepki basqıshında 200 bas násilli qaramal alıp kelinip, olardı baǵıw hám kóbeytiw jumısları jolǵa qoyıldı.
Bunday xalıqaralıq birge islesiw joybarları aymaqlarda sharwashılıqtı turaqlı rawajlandırıw, xalıqtıń bántligin támiyinlew hám azıq-awqat qáwipsizligin bekkemlewde úlken áhmiyetke iye bolmaqta.

Qaraqalpaqstan xabar agentligi