Bizge belgili, insan huqıqların támiyinlew hám jámiyette nızam ústinligin bekkemlew hár qanday demokratiyalıq mámlekettiń bas maqseti. Usı kózqarastan, elimizde jasap atırǵan puqaralıǵı bolmaǵan shaxslardıń (PBSh) huqıqıy statusın tártipke salıw hám olardıń jasaw ornı boyınsha esapta turıwın támiyinlew ishki qáwipsizlik hám sociallıq qadaǵalawdıń áhmiyetli buwını bolıp esaplanadı.
Sońǵı jılları Ózbekstan Respublikasında migraciya nızamshılıǵın liberallastırıw baǵdarında úlken reformalar ámelge asırılǵan bolsa da, jasaw hám turǵan jeri boyınsha dizimnen ótiw minnetlemesi qatań belgilengen huqıqıy norma bolıp qalmaqta.
Tashkent mámleketlik yuridikalıq universiteti Yuridikalıq klinikasınıń xızmetkeri Imomali Tuev bul boyınsha tómendegilerdi málim etti:
– Ózbekstan Respublikası puqarasınıń, Ózbekstan Respublikasında turaqlı jasaytuǵın sırt el puqarasınıń hám puqaralıǵı bolmaǵan shaxstıń jasaw ornı yamasa turǵan jeri boyınsha dizimnen ótpesten jasawı, bazalıq esaplaw muǵdarınıń 3 esesi muǵdarında járiyma salıwǵa sebep boladı.
Bul huqıqbuzarlıq hákimshilik jaza sharası qollanılǵannan keyin 1 jıl dawamında qaytadan islengen bolsa, bazalıq esaplaw muǵdarınıń 5 esesi muǵdarında járiyma salıwǵa sebep boladı.
Ózbekstanda jasap atırǵan hár bir insan – ol puqara bola ma, shet elli bola ma yamasa puqaralıǵı bolmaǵan shaxs bola ma mámleket nızamlarına ámel etiwi shárt. Ásirese, jasaw yamasa turǵan jeri boyınsha turaqlı hám waqtınsha dizimnen ótiw máselesi kúndelikli turmısta eń kóp ushırasatuǵın, biraq kóbinese itibardan shette qalatuǵın huqıqıy minnetlemelerden biri bolıp esaplanadı.
Gulnoza Boboeva, ÓzA