Pikir
Aqıllı adamlar basqalardan hár qanday jaǵdayǵa bolǵan múnásibeti hám qabıl etken qararları menen ajıralıp turadi. Olar, bárinen burın, aqıl tárezisi ólshemin ańlaǵan insanlar. Sonıń ushın da bunday insanlarǵa jaqın bolıw, olardan jasaw danalıǵın ózlestiriw áhmiyetli bolıp esaplanadı.
Adamzat ómir jollarında túrli jumbaqlarga dus keledi. Tábiyiy, bunda hár kim qátege jol qoyıwı múmkin. Gáp sonda, qátelesken adamǵa átirapındaǵılardıń múnásibeti kópshilik jaǵdaylarda unamlı bolmaydı. Ásirese, biziń mentalitetimizde bala esin bilgeli, qátelespewge shaqırıladı. Ashınarlısı, aljassa, keshirilmeytuǵını uqtıradı. Bul bolsa bala sanasında úlken tosıq payda bolıwına alıp keledi. Solay etip, balanıń kompetenciyası qápeske salınǵan qustay buwıladı.
Biz joqarıda biykarǵa aqıllı adamlar pazıyletleri haqqında sóz etpedik. Sebebi, olar hesh qashan adasıwdı qadaǵan etpeydi. Sebebi ózleri de qátelerden shıǵarılǵan durıs juwmaqlar nátiyjesi sıpatında aqıllı bolǵan.
– Eń joqarı ilimler de qátelikler nátiyjesi bolıp esaplanadı”, deydi kóplegen ruwxıy-aǵartıwshılıq shıǵarmalardıń avtorı, filologiya ilimleriniń kandidatı Abdumurod Tilovov. – Bárkamal áwlad jetistiriwdiń tiykarǵı talabı – pikirlew salamatlıǵı bolıp esaplanadı. Solay eken, perzent tárbiyasında qáte islewge hám onı óz waqtında dúzetiwge imkaniyat beriw lazım.
Juwmaqlap aytqanda, nátiyje kútiwden aldın háreket áhmiyetli. Háreket etken hár qanday adam bolsa aljasıwı tábiyiy. Shıńǵa jetip barǵansha hár qanday joldan júrip kórilgendey, unamlı nátiyjege eriskenshe utılıwlar ushırasıwı anıq. Solay eken, qáteler úlken tabıslardıń gilti ekenin umıtpayıq. Perzentler tárbiyasında bolsa buǵan ayrıqsha itibar qaratıwdı da…
Sherbek Islomov,
ÓzA