Qaraqalpaqstan Respublikası Joqarǵı Keńesiniń Baslıǵı Tórtkúl rayonında bolıp, xalıqqa sapalı kommunallıq xızmet kórsetiw, turaq jaylar, ekonomika tarmaqları hám sociallıq taraw obektlerin gúzgi-qısqı máwsimge tayarlaw jumıslarınıń jaǵdayın úyrendi.
Elimizde adamlardıń kúndelikli turmısı, abadanlıǵı, densawlıǵı hám keypiyatına tikkeley baylanıslı bul máselelerge turaqlı itibar qaratıp kelinbekte. Atap aytqanda, “Ǵalaba” máhállesindegi transformator punktiniń jumısı kózden ótkerilip, elektr tarmaqlarındaǵı joǵaltıwlardı azaytıw hám úzliksiz uzatıwdı támiyinlew boyınsha ámelge asırılıp atırǵan ilajlar tallanıp, anıqlanǵan kemshiliklerdi jedellik penen saplastırıw boyınsha juwapkerlerge tapsırmalar berildi.
Sonday-aq, Joqarǵı Keńes Baslıǵı “Ullıbaǵ” APJdaǵı gaz bólistiriw qurılmalarınıń islew jaǵdayı hám energiyanı únemlewin kózden ótkerdi. “Ibn Sino” máhállesiniń Tórtkúl kóshesinde alıp barılıp atırǵan gaz tarmaǵın rekonstrukciyalaw procesi menen jaqınnan tanıstı.
Mánzilli úyreniwler dawamında gaz qubırların tártipke keltiriw, boyaw hám gaz shıǵıwınıń aldın alıw arqalı qáwipsizlikti támiyinlew boyınsha anıq kórsetpeler belgilendi. Bul tarawlardaǵı jumıslardı izbe-iz dawam ettiriw, barlıq turaq jaylar, mektep, emlewxana hám basqa da sociallıq obektlerdiń gúzgi-qısqı máwsimde jıllı bolıwın támiyinlew boyınsha áhmiyetli wazıypalar belgilenip, juwapkerlerge zárúr kórsetpeler berildi.
Bunnan keyin Joqarǵı Keńes Baslıǵı nuranıylar hám máhálle belsendileri menen ushırasıp, aymaqtı sociallıq-ekonomikalıq rawajlandırıw hám xalıqtıń abadanlıǵın arttırıwǵa qaratılǵan keń kólemli reformalar boyınsha pikir alıstı.

Qaraqalpaqstan xabar agentligi