Oliy Majlis Nızamshılıq palatasınıń gezektegi májilisi bolıp ótpekte. Májiliste dáslep Ózbekstan Respublikası Prezidenti Administraciyasınıń huqıqıy statusı, tiykarǵı wazıypaları, jumısın shólkemlestiriw tártibi jáne wákilliklerin belgilep beretuǵın “Ózbekstan Respublikası Prezidenti Administraciyası haqqında”ǵı Konstituciyalıq nızam joybarı birinshi oqıwda kórip shıǵıldı.
– Jańa redakciyadaǵı Konstituciyamızda mámleketlik hákimiyattıń shólkemlestiriliwi, atap aytqanda, Ózbekstan Respublikası Oliy Majlisi, Ózbekstan Respublikası Prezidenti, Ministrler Kabineti, jergilikli mámleketlik hákimiyattıń tiykarları ayrıqsha baplarda tolıq bayan etilgen, – dedi komitet baslıǵı Jahongir Shirinov. – Konstituciyamızdıń XIX babı Ózbekstan Respublikasınıń Prezidentine baǵıshlanǵan bolıp, onda Prezident mámleket basshısı statusında mámleketlik hákimiyat uyımlarınıń kelisilgen halda jumıs alıp barıwın hám birge islesiwin támiyinlewi, sonday-aq, onıń mámleketti basqarıw hám rawajlanıwın támiyinlewdegi oǵada áhmiyetli wákillikleri bekkemlengen. Konstituciyada belgilengen Prezident wákillikleri oǵada keń kólemli bolıp, olardıń nátiyjeli ámelge asırılıwın shólkemlestiriwshilik, huqıqıy hám analitikalıq támiyinlew Prezident Administraciyasına júklengen.
Atap aytqanda, Tiykarǵı nızamımızdıń 109-statyasına muwapıq Ózbekstan Respublikası Prezidenti óz wákilliklerin ámelge asırıwdı shólkemlestiriwshilik, huqıqıy, analitikalıq jaqtan támiyinlew maqsetinde Ózbekstan Respublikası Prezidenti Administraciyasın qáliplestiredi hám onıń Baslıǵın tayınlaydı. Prezident Administraciyasınıń huqıqıy statusı, tiykarǵı wazıypaları, jumısın shólkemlestiriw tártibi hám wákillikleri nızam menen belgilenetuǵını názerde tutılǵan.
Konstituciyamız talaplarınan kelip shıqqan halda islep shıǵılǵan bul nızam joybarı Prezident Administraciyasınıń mámleketlik basqarıw sistemasındaǵı ornı, huqıqıy statusı hám jumısınıń tiykarǵı baǵdarların konstituciyalıq nızam dárejesinde belgilewge qaratılǵan.
Joybarda Administraciya Ózbekstan Respublikası Prezidenti tárepinen qáliplestiriliwi, sonday-aq, Administraciyaǵa Prezident tárepinen lawazımǵa tayınlanatuǵın hám lawazımınan azat etiletuǵın Administraciya Basshısı basshılıq etiwi belgilenbekte.
Administraciyanıń statusı, jumısınıń tiykarǵı principleri, strukturalıq dúzilisi hám jumısın shólkemlestiriw tártibi, onıń mámleketlik hákimiyat uyımları hám shólkemleri menen óz-ara baylanısları, Administraciyanıń lawazımlı shaxsları, basqarıw hám xızmetker xızmetkerleriniń jumısınıń kepillikleri anıq belgilep berilmekte, – dedi J.Shirinov.
Atap ótilgenindey, bul nızam joybarı menen Administraciyanıń mámleketlik uyımlar hám shólkemlerdiń komplaens hám korrupciyaǵa qarsı ishki qadaǵalaw strukturaları menen baylanısları ashıp berilgen.
Nızam joybarın tayarlawda xalıqaralıq hám sırt el tájiriybesi úyrenip shıǵılǵan. Atap aytqanda, AQSh, Finlyandiya, CHexiya, Slovakiya, Rumıniya, Latviya, Tayvan, Qazaqstan, Túrkmenstanda Prezident administraciyası (kancelyariyası, ofisi)nıń huqıqıy statusı óz aldına nızamlarda belgilengen.
Bul konstituciyalıq nızam joybarınıń qabıl etiliwi Prezident jumısın shólkemlestiriwshilik, huqıqıy hám analitikalıq jaqtan támiyinlewdiń huqıqıy mexanizmlerin jetilistiriw, mámleketlik uyımlar arasındaǵı birge islesiwdi bekkemlew jáne basqarıw processleriniń nátiyjeliligin arttırıwǵa xızmet etedi.
Dodalawlarda bir qatar sorawlar ortaǵa taslanıp, tiyisli juwaplar qaytarıldı. Atap aytqanda, Administraciya shólkemlerdiń komplaens hám korrupciyaǵa qarsı gúresiwde mexanizmleri qanday bolıwı máselesi kóterildi. Buǵan juwap retinde ayrıqsha statyada Administraciyanıń komplaens hám korrupciyaǵa qarsı gúresiw jumısı belgilep berilgeni, Administraciyada bul boyınsha ayrıqsha struktura jumıs alıp baratuǵını aytıp ótildi.
Dodalawlardan soń nızam joybarı deputatlar tárepinen birinshi oqıwda qabıl etildi.
Muhtarama Komilova, ÓzA