Prezident Shavkat Mirziyoevqa “Ózbekneftgaz” akcionerlik jámiyetiniń usı jıldıń birinshi yarımındaǵı jumısı hám jıldıń aqırına shekemgi tiykarǵı wazıypaları boyınsha esabat berildi.
Usı jıldıń birinshi yarımında jámiyet tárepinen 11,5 milliard kub metr tábiyiy gaz qazıp shıǵarıldı. Házirgi waqıtta neft, dizel janılǵısı, aviakerosin hám suyıltılǵan gaz islep shıǵarıw kólemi prognoz kórsetkishlerinen joqarı boldı.
Jıldıń aqırına shekem 1 million 100 mıń tonna avtobenzin, 983 mıń tonna dizel janılǵısı, 310 mıń tonna aviakerosin, 606 mıń tonna suyıltılǵan gaz hám derlik 1 million 180 mıń tonna sintetikalıq ónim islep shıǵarıw názerde tutılǵan.
Dúnyadaǵı geosiyasiy jaǵday keskinlesiwi nátiyjesinde Oraylıq Aziya jónelisinde aviaqatnawlar sanı artıp barmaqta. Sonıń ishinde, Ózbekstanǵa ámelge asırılıp atırǵan reysler sanı 2025-jılǵa salıstırǵanda kóbeygen. Usı jıldıń iyul-dekabr aylarında aviakerosinge bolǵan talap 375 mıń tonnanı quraytuǵını, yaǵnıy ótken jıldıń sáykes dáwirine salıstırǵanda 27 procentke ósiwi kútilmekte. Onıń tiykarǵı bólegi jergilikli neftti qayta islew zavodları esabınan qaplanadı.
Sonıń menen birge, ayırım birge islesiwshi ellerde neft ónimleri eksportına sheklewler engizilgeni sebepli alternativ dereklerden, sonıń ishinde, Gruziya, Iraq hám basqa da mámleketlerden aviakerosin import etiw jolǵa qoyıldı.
Geologiyalıq-izlew jumıslarınıń sapası hám kólemin arttırıw maqsetinde “Ózbekgeofizika” akcionerlik jámiyetin modernizaciyalaw rejeleri haqqında da málimleme berildi. Taw-geofizika úskenelerin jańalaw hám zamanagóy dala 3D seysmikalıq kompleksin satıp alıw ushın 38,8 million dollar qaratıw názerde tutılǵan.
Sonday-aq, sırt el kompaniyaları, atap aytqanda, AQShtıń “Schlumberger” kompaniyası menen birgelikte seysmikalıq maǵlıwmatlardı qayta islew orayın shólkemlestiriw boyınsha jumıslar alıp barılıp atırǵanı málim etildi. Orayda zamanagóy superkompyuter kompleksi ornatıladı, jańa baǵdarlamalıq támiynatlar satıp alınıp, seysmikalıq izertlewlerde jasalma intellektten keńnen paydalanıw jolǵa qoyıladı.
Bul ilajlar esabınan jıllıq 3D seysmikalıq izertlewler maydanı 1 mıń 800 kvadrat kilometrden 5 mıń kvadrat kilometrge, úyreniw tereńligi bolsa 4,5 mıń metrden 8 mıń metrge jetkeriledi. Tayarlanatuǵın perspektivalı geologiyalıq strukturalardıń sanı 19 dan 30 ǵa artadı.
Qudıqlar qurılısında joqarı temperatura hám basımǵa shıdamlı materiallar, ultrasesli karotaj, real waqıt rejiminde geofizikalıq qadaǵalaw hám gorizontal burawlaw texnologiyaların engiziw ilajları belgilengen. Bul qıyın geologiyalıq sharayatlarda qudıqlardıń isenimliligin arttırıw, ónimdar qatlamlardan nátiyjeli paydalanıw hám joqarı debitke erisiw imkaniyatın beredi.
Mámleketimiz basshısı xalıq hám ekonomika tarmaqların neft ónimleri menen turaqlı hám úzliksiz támiyinlew ilajların kóriw boyınsha tapsırmalar berdi.
Sonday-aq, tarmaq kárxanaların texnologiyalıq jańalaw, energiya nátiyjeliligin arttırıw, óndiris qárejetlerin qısqartıw hám belgilengen ilajlardıń orınlanıwın qatań qadaǵalaw wazıypası qoyıldı.
ÓzA