Ózbekstan Respublikası Prezidenti Shavkat Mirziyoev Qırǵız Respublikası Prezidenti Sadir Japarovtıń mirát etiwine bola 30-iyul – 1-avgust kúnleri mámleketlik sapar menen usı elde boldı.
Rásmiy emes Másláhát ushırasıwı sheńberinde 1-avgust kúni Ózbekstan, Qırǵızstan, Qazaqstan hám Tájikstan Prezidentleri Íssıqkólde suw-motor sportı boyınsha Qırǵızstan Gran-prisiniń saltanatlı ashılıw máresiminde qatnastı.
Jetekshiler jarıs qatnasıwshıları hám miymanların qutlıqladı.
Ózbekstan Respublikası Prezidenti Shavkat Mirziyoev ómirlik joldası menen birgelikte sportshılardıń saylap alıw jarısın baqladı.
Gran-pri Xalıqaralıq suw-motor sportı awqamınıń qáwenderliginde ótkerilip atırǵan “suwdaǵı Formula-1” atı menen belgili bolǵan F1H2O jáhán chempionatınıń ekinshi basqıshı bolıp esaplanadı. Jarıslarda hár jılı túrli mámleketlerden professional komanda hám sportshılar qatnasadı. Jáhán chempionatı basqıshı Oraylıq Aziyada birinshi márte ótkerilmekte.
Baǵdarlamadan shınıǵıwlar, saylap alıw basqıshı hám saatına 220 kilometrden artıq tezlikte háreketlenetuǵın tez júrer qayıqlardaǵı tiykarǵı jarıs orın alǵan.
Mámleketimiz basshısı sapardıń birinshi kúni Sholpanata qalasında qırǵızstanlı kásiplesi menen tar sheńberde hám rásmiy delegaciyalardıń qatnasıwında sóylesiwler ótkerdi. Ushırasıwlarda hár tárepleme strategiyalıq sheriklik qatnasıqların jáne de tereńlestiriw, sawda kólemin arttırıw, sanaat kooperaciyasın rawajlandırıw, transport tarawında óz-ara baylanıslılıqtı bekkemlew, suw-energetika hám mádeniy-gumanitarlıq baǵdarlarda birge islesiwdi keńeytiw máseleleri kórip shıǵıldı.
Eki tárepleme birge islesiwdi eń joqarı dárejege alıp shıǵatuǵın Awqamlaslıq qatnasıqları haqqındaǵı shártnamaǵa qol qoyılıwı sammittiń áhmiyetli nátiyjesi boldı. Mámleketleraralıq keńes dúziw boyınsha kelisimge erisildi.
Sonday-aq, mámleketlik shegara, sociallıq qorǵaw hám pensiya támiynatı, joqarı bilimlendiriw, puqaralardıń kelip-ketiwi, mádeniyat, turizm hám agrosanaat kompleksine baylanıslı salmaqlı hújjetler toplamı almasıldı.
Óz-ara tovar almasıwdıń kólemin 3 milliard dollarǵa jetkeriw, sanaat kooperaciyası boyınsha jańa joybarlardı ámelge asırıw, “Qıtay-Qırǵızstan-Ózbekstan” temir jolı boylap infrastrukturanı rawajlandırıw hám Qambarata GES-1di qurıw joybarın jedellestiriw boyınsha anıq ilajlar belgilendi.
Sapar etiw sheńberinde Ózbekstan Respublikası Prezidenti Shavkat Mirziyoevtiń Qırǵızstannıń joqarı mámleketlik sıylıǵı – I dárejeli “Manas” ordeni menen sıylıqlanǵanı tereń rámziy mánige iye. Bul sıylıq tek ǵana diplomatiyalıq protokol emes. Bul, eki tuwısqan xalıq arasındaǵı kóp ásirlik doslıq hám jaqsı qońsıshılıq baylanısların tiklegen, qatnasıqlardı strategiyalıq hám awqamlaslıq dárejesine kótergen jeke siyasiy erk-ıqrar hám pidayılıqqa berilgen joqarı baha bolıp esaplanadı.
Prezidentimiz óziniń shıǵıp sóylegen sózinde ayrıqsha atap ótkenindey, búgingi tabıslar bul eki mámleket basshılarınıń birdey umtılısları hám xalıqlarımızdıń ásirlik arzıw-niyetleriniń ámelge asıwı bolıp esaplanadı.
Ulıwma alǵanda, házirgi Ózbekstan – Qırǵızstan qatnasıqları basqa mámleketler ushın da haqıyqıy qońsıshılıq hám óz-ara paydalı birge islesiw úlgisi bola aladı. Sebebi, isenim, húrmet hám ashıq-aydınlıqqa tiykarlanǵan siyasat hár qanday tosqınlıqtı jeńip ótiwge uqıplı.
Prezidentimiz sapar etiwdiń ekinshi kúni Oraylıq Aziya hám Ázerbayjan mámleket basshılarınıń rásmiy emes ushırasıwında qatnastı. Birge islesiwdiń institucionallıq tiykarların bekkemlew, sawda hám transport óz-ara baylanıslılıǵın rawajlandırıw, sanlı xızmetlerdi keńeytiw, bilimlendiriw, ilim hám innovaciyalardı rawajlandırıw, klimat ózgeriwi menen baylanıslı mashqalalarǵa birgelikte gúresiw hám gumanitarlıq almasıwlardı keńeytiw máselelerin qamtıp alǵan regionallıq birge islesiwdiń tiykarǵı baǵdarları boyınsha óz kózqarasın bildirdi.
Sapar etiw sheńberinde mámleket basshıları Qırǵızstandaǵı birinshi xalıqaralıq kategoriyadaǵı golf klubı, jańa bes juldızlı “Baku” miymanxanası hám Íssıqkólde suw-motor sportı boyınsha chempionattıń ashılıw máresimlerinde qatnastı.
Ózbekstan Respublikası Prezidenti Shavkat Mirziyoevtiń Qırǵız Respublikasına mámleketlik saparı jáne Oraylıq Aziya hám Ázerbayjan mámleket basshılarınıń rásmiy emes Másláhát ushırasıwınıń ilajlarǵa bay baǵdarlaması juwmaqlandı. “Íssıqkól” aeroportında mámleketimiz jetekshisin hám ómirlik joldasın Qırǵız Respublikası Prezidenti Sadir Japarov hám ómirlik joldası shıǵarıp saldı.
ÓzA