Húrmetli Sadir Nurgojoevich!

Húrmetli mámleket basshıları!

Qırǵızstan Prezidenti húrmetli Sadir Nurgojoevich Japarovqa rásmiy emes ushırasıwımızdı ótkeriw baslaması hám “Qırǵız teńizi” – gózzal Íssıqkól jaǵasındaǵı jıllı qabıllaw ushın shın júrekten minnetdarshılıq bildiremen.

Eki kún dawamında Qırǵızstanda bolıp, Siziń basshılıǵıńızda ámelge asırılıp atırǵan keń kólemli reformalardıń nátiyjeleri mende úlken tásir qaldırdı. Mámleket ekonomikalıq rawajlanıw boyınsha joqarı pátlerdi kórsetpekte, onıń xalıqaralıq abırayı turaqlı artıp barmaqta.

Sizdi hám tuwısqan qırǵız xalqın Qırǵızstannıń BMSh Qáwipsizlik Keńesiniń turaqlı bolmaǵan aǵzası etip saylanǵanı menen qutlıqlaymız.

Túrkmenstan Prezidenti Serdar Gurbangulievich Berdimuhamedovqa da Másláhát ushırasıwları formatında nátiyjeli basshılıq etip atırǵanı ushın minnetdarshılıq bildiremen.

Húrmetli ushırasıw qatnasıwshıları!

Búgin biz mámleketlerimiz ǵárezsizliginiń 35 jıllıq bayramların belgilew aldında jıynalıp turmız. Usı jıllar dawamında hár bir elmámleketshiliktiń qáliplesiwi, ekonomikalıq ósiw hám milliy tikleniwdiń ózine tán hám tákirarlanbas jolın basıp ótti.

Burın birlespegen Oraylıq Aziya búgingi kúnde birgeliktegi háreketlerimiz nátiyjesinde rawajlanıwdıń ulıwma maqsetleri jolında birlespekte.

Sonıń menen birge, qıyın hám aldınnan boljap bolmaytuǵın búgingi xalıqaralıq waqıya bizden jáne de isenimli háreket etiwdi hám jáne de tıǵız muwapıqlastırıwdı talap etpekte.

Ázerbayjannıń Másláhát ushırasıwları formatına qosılıwı óz-ara birge islesiwimizdi sapa jaǵınan jańa – makroaymaqlıq dárejege alıp shıqpaqta.

Biz ushın Oraylıq Aziya, Qubla Kavkaz hám jaqın qońsımız – Awǵanstandı birlestiretuǵın birden-bir rawajlanıw mákanın qáliplestiriw baǵdarında tariyxıy imkaniyat ashılmaqta. Bul jaǵdaydan tolıq paydalanıp, birgeliktegi is-háreketlerimiz benen Evraziya júreginde turaqlı rawajlanıw, óz-ara baylanıslılıq hám jaqsı qońsıshılıq ushın bekkem tiykar jaratıwımız zárúr.

Húrmetli kásiplesler!

Regionallıq birge islesiwdiń turaqlı arxitekturasın qáliplestiriwge ótiw waqtı keldi. Onıń dúziliwi birge islesiwdiń nátiyjeli institutları, tarmaq uyımlarınıń tıǵız qatnasıqları, aymaqlardıń tikkeley baylanısları hám rawajlanıwdıń tiykarǵı baǵdarlarındaǵı uzaq múddetli birgeliktegi baǵdarlamalarǵa súyeniwi zárúr.

Regionımızdıń xalıqaralıq subekt sıpatındaǵı statusın bekkemlegen halda mámleketleraralıq shólkemler hám “Oraylıq Aziya plyus” formatları sheńberinde óz-ara muwapıqlastırıwdı kúsheytiw zárúr.

Sawda-ekonomikalıq hám transport tarawındaǵı óz-ara baylanıslılıqtı bekkemlew, úzliksiz sanaat-texnologiyalıq shınjırlardı keńeytiw, ulıwma sanlı xızmetlerdi rawajlandırıw hám investiciya platformaların iske qosıw boyınsha kelesi qádemlerdi puqta islep shıǵıw kerek.

Oraylıq Aziya bilimlendiriw, ilim hám úlken maǵlıwmatlar tarawında innovaciyalar boyınsha básekige shıdamlı xabqa aylanıwı kerek. Oǵan kadrlar potencialı, jasalma intellekt texnologiyaları, data-oraylar hám energetika quwatlıqların birlestirgen tutas infrastrukturanı jaratıw arqalı erisiw múmkin.

Qorshaǵan ortalıqtı qorǵaw bárqulla regionallıq kún tártibiniń tiykarǵı baǵdarı bolıp kelgen hám sonday bolıp qaladı. Birden-bir tábiyiy mákanımızda júzege kelip atırǵan qáwip-qáterler mámleket shegaraların tán almaydı, solay eken, olarǵa juwap ilajları da ulıwmalıq bolıwı kerek.

Bıyılǵı jıldıń anomal dárejede ıssı keliwi klimat ózgeriwi álleqashan ekonomika, suw hám energetika qáwipsizligi, adamlardıń salamatlıǵı hám turmıs sapasına tikkeley tásir etetuǵın faktorǵa aylanıp atırǵanın jáne bir márte kórsetti. Mine usınday jańa qáwip-qáterlerge birgelikte beyimlesiw boyınsha uzaq múddetli sheshimlerdi tabıw áhmiyetli.

Birge islesiwimizdiń ózgermes tiykarǵı baǵdarları arasında gumanitarlıq baylanıslar úlken áhmiyetke iye. Xalıqlarımız ásirler dawamında iyinles jasaǵan, sawdanı rawajlandırǵan, bilim hám mádeniy dástúrler menen óz-ara almasqan.

Zamanagóy birge islesiw tereńlesken sayın awızbirshilik sezimi de bekkemlenbekte. Ulıwma regionallıq ózine tánlik, xalıqlarımızdıń milliy ózligi saqlanǵan halda basqıshpa-basqısh qáliplespekte.

Bul tarawdaǵı jumıslardıń mazmunı sapa jaǵınan ózgeriwi xalıqlarımız arasındaǵı birlik, awızbirshilik hám óz-ara túsinisiw sezimin bekkemleytuǵınına isenemen.

Áziz doslar!

Birge islesiwimizdi bunnan bılay da bekkemlew boyınsha búgin bildirilgen baslama hám usınıslardı tolıq qollap-quwatlayman.

Pursattan paydalanıp, Qazaqstan Respublikası Prezidenti húrmetli Qasım-Jomart Kemelevich Toqaevqa hám pútkil qazaq xalqına jańa Qurıltayǵa saylawlar tabıslı ótiwin tilep qalaman.

Sózimniń juwmaǵında biziń ulıwma kúshimiz – birlik, óz-ara isenim hám birgeliktegi dóretiwshilikke qatań sadıqlıǵımızda ekenin jáne bir márte atap ótpekshimen.

Bársheńizge bekkem densawlıq, tınıshlıq hám jańa tabıslar, mámleketlerimiz xalıqlarına bolsa abadanlıq hám rawajlanıw tileymen.

ÓzA