Qádirli watanlaslar!

Bárinen burın, siz, ázizlerdi, pútkil Ózbekstan xalqın elimizde keńnen belgilenip atırǵan qutlı áyyyam – Xalıqlar doslıǵı kúni menen shın kewlimnen qızǵın qutlıqlayman.

Álbette, bul quwanıshlı bayramda kóp milletli xalqımızdıń ullı umtılısları, ámeliy háreketleri menen jámiyetimizde húkim súrip atırǵan tınıshlıq hám tatıwlıq, milletler hám dinleraralıq doslıq, keńpeyillik hám awızbirshilik biziń eń biybaha baylıǵımız ekenin jáne de tereń sezemiz.

Búgingi kúnde elimizde 130 dan aslam millet hám xalıq, 16 diniy konfessiya wákilleri bir shańaraq perzentlerindey tatıw hám awızbirshilikli jasap, elimizdiń rawajlanıwına múnásip úles qosıp kiyatırǵanın bárshemiz joqarı qádirleymiz.

Oǵada biybaha sociallıq hádiyse bolǵan bunday milliy-mádeniy kóptúrlilik Jańa Ózbekstannıń hár bir puqarası, milleti, tili hám dinine qaramastan, erkin jáne abadan jasaytuǵın insanıy mámleket sıpatındaǵı ornın hám abırayın arttırıwda áhmiyetli rol atqarmaqta.

Sońǵı jıllarda “Biziń kúshimiz – birlik hám awızbirshilikte” degen iygilikli ideya tiykarında elimizde milletleraralıq tatıwlıq hám keńpeyilliktiń ózine tán ibratlı modelin jaratqanımız benen hár qansha maqtansaq arzıydı.

Házirgi waqıtta milletleraralıq qatnasıqlar tarawında ámelge asırıp atırǵan reformalarımızdıń kólemi barǵan sayın keńeyip, sapa hám mazmun jaǵınan jańa basqıshqa kóterilmekte. Bul baǵdarda qabıl etilgen 10 normativlik-huqıqıy hújjet, sonıń ishinde, Milletleraralıq qatnasıqlar tarawında mámleketlik siyasat koncepciyası jumısımızdıń nátiyjeliligin arttırıwda áhmiyetli huqıqıy tiykar bolıp xızmet etpekte.

Sońǵı jıllarda kórkem imaratlarda jumıs alıp barıp atırǵan 157 milliy mádeniy oray hám 46 doslıq jámiyetiniń materiallıq-texnikalıq bazası bekkemlendi. Bul orınlarda ótkerilip atırǵan ulıwma milliy bayramlar, doslıq kesheleri, festival hám ushırasıwlar elimizdiń mádeniy kelbetin belgileytuǵın áhmiyetli aǵartıwshılıq ilajlarǵa aylanıp barmaqta.

Elimizdegi bilimlendiriw mákemelerinde oqıw processleri jeti tilde alıp barılmaqta, tuwısqan tillerdegi mektepler mámleket esabınan sabaqlıq hám ádebiyatlar menen támiyinlenbekte. Teleradiokanallar arqalı 12 tilde kórsetiw hám esittiriwler efirge uzatılmaqta, 14 tilde gazeta hám jurnallar basıp shıǵarılmaqta.

Ótken jılı Xalıqlar doslıǵı kúni aldınan paytaxtımızda ashılǵan Milliy mádeniy oraylardıń pavilonı xalıqaralıq jámiyetshilik tárepinen keńnen tán alınıp, kóplegen sırt elli miymanlar da keletuǵın orınǵa aylandı.

Paytaxtımızdaǵı “Jańa Ózbekstan” parki aymaǵında “Keńpeyillik baǵı,” Qaraqalpaqstan Respublikası hám wálayatlarda etno hám turistlik awıllar shólkemlestirilgeni bul baǵdardaǵı jumıstı keńeytiwde áhmiyetli rol atqarmaqta.

Hár qıylı milletke tiyisli watanlaslarımız arasında onlaǵan deputat hám senatorlar, mámleketlik hám jámiyetlik ǵayratkerler, belgili óndiris, ilim, mádeniyat, kórkem óner hám sport ǵayratkerleri, biznes wákilleri múnásip jumıs alıp barıp atırǵanı, olardıń 2 mıńǵa shamalası Watanımızdıń joqarı ataqları, orden hám medalları menen sıylıqlanǵanı elimizde húkim súrip atırǵan sociallıq teńlik, ádillik hám inklyuzivliktiń ámeliy úlgisi, desek, durıs boladı.

Húrmetli watanlaslar!

Sheksiz Oraylıq Aziya regionı xalıqlarınıń ázelden birdey maqsetler tiykarında jasap, miynet etip, rawajlanıw baǵdarında qanday úlken nátiyjelerge eriskenin, bunday iygilikli dástúrler sońǵı jıllarda jáne de kúsheyip, jańa basqıshqa kóterilip atırǵanın bárshemiz kórip turmız.

Biz qońsı mámleketler menen doslıq, óz-ara isenim hám húrmetke tiykarlanǵan qatnasıqlarımızdı bekkemlep, strategiyalıq sheriklik hám awqamlaslıqtı jáne de rawajlandırmaqtamız.

Xalıqlarımız arasında erkin barıs-kelisler, ekonomikalıq hám mádeniy-gumanitarlıq baylanıslar keńeyip, jańasha mazmun menen bayıp atırǵanı, bunday ómir baǵıshlaytuǵın processlerde Ózbekstannıń ayrıqsha ornı hám úlesi bar ekeni ayrıqsha dıqqatqa ılayıq.

Sońǵı jılları sizler menen, el-jurtımız benen birgelikte xalıqlar doslıǵın bekkemlew jolında erisken tabıslarımızdı jáne de bayıtıw biz ushın bunnan bılay da bas wazıypa bolıp qaladı.

Bárshemiz jaqsı bilemiz, túrli millet wákillerin óz-ara jaqınlastırıwda kórkem óner hám mádeniyat bárqulla ruwxıy kópir wazıypasın atqarıp kelgen. Hár bir millettiń biytákirar kórkem ónerin mine usı tiykarda rawajlandırıw – bul ulıwmainsanıylıq birlik hám tatıwlıqqa alıp baratuǵın eń isenimli jol.

Usı maqsette elimizde túrli millet hám xalıq wákillerinen ibarat bolǵan professional “Doslıq” ansamblin shólkemlestiriwdi rejelestirgenbiz hám bunıń ushın barlıq sharayatlardı jaratıp beremiz.

Bul jańa dóretiwshilik jámáát mine usınday qolaylı ortalıqta qáliplesip hám rawajlanıp, elimizdiń mádeniy turmısında álbette múnásip orın iyeleydi, dep oylayman.

Qádirli doslar!

Hesh qashan umıtpayıq, xalıqlar doslıǵı bul – muqaddes insanıylıq qádiriyat, tınısh, erkin hám abadan turmıs girewi bolıp esaplanadı. Búgingi kúnde hámmemiz ózimiz, shańaraǵımız, perzentlerimizdiń baxtı, janajan Ózbekstanımızdıń táǵdiri hám keleshegi ushın birden-bir xalıq, birden-bir jámiyet bolıp háreket etip atırǵan ekenbiz, joqarı maqsetlerimizge álbette jetemiz.

Siz, ázizlerdi, pútkil xalqımızdı 30-iyul – Xalıqlar doslıǵı kúni menen jáne bir márte qızǵın qutlıqlayman.

Bársheńizge bekkem densawlıq, tınıshlıq, shańaraqlıq baxıt, elimizdiń rawajlanıwı jolındaǵı ullı jumısıńızda úlken tabıslar tileymen.

Ózbekstanımız hámiyshe tınısh hám turaqlı bolsın, birgeliktegi pidayı miynetimiz benen jáne de gúllep-jasnasın!

Shavkat MIRZIYOEV,
Ózbekstan Respublikası Prezidenti