Ózbekstan Respublikası Prezidenti Shavkat Mirziyoev Qazaqstan Respublikası Prezidenti Qasım-Jomart Toqaevtıń mirát etiwine bola 29-iyul kúni ámeliy sapar menen usı elde boldı.

Mámleketimiz basshısı Astana qalasında «Keleshek oyınları» úshinshi xalıqaralıq jarısınıń saltanatlı ashılıw máresiminde qatnastı.

“Barıs Arena” muz sarayında ótkerilgen ilajǵa Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám basqa da sırt elli miymanlar qatnastı.

Máresim qatnasıwshılarına Rossiya Federaciyası Prezidenti Vladimir Putin videomúrájat jolladı.

Ilajdıń saltanatlı bóliminde fijital-sporttıń mazmun-mánisi, yaǵnıy sanlı bellesiwlerdi dástúriy sport túrleri hám fizikalıq belsendilik penen birlestiretuǵın baǵdarlar haqqında maǵlıwmat berildi. Jarıstıń ideyası jaslardı dástúriy sport penen shuǵıllanıwǵa shaqırıw bolıp esaplanadı.

Mámleketimiz basshısı xalıqaralıq turnir qatnasıwshıların qutlıqladı.

Sol kúni sport hám texnologiyalar ministrleri, diplomatiyalıq missiyalardıń basshıları hám basqa da joqarı mártebeli wákillerdiń qatnasıwında fijital-sport boyınsha sammit te bolıp ótti.

Birinshi «Keleshek oyınları» 2024-jılı Kazan qalasında ótkerilgen. Onıń ashılıw máresimine Ózbekstan Prezidenti Shavkat Mirziyoev qatnasqan edi. Ekinshi turnir bolsa 2025-jılı Abu-Dabi qalasında bolıp ótti.

Bul retki jarıslarda Ózbekstan wákilleri fijital-futbol, lazertag hám ayaq oyın baǵdarları boyınsha bellesedi.

Usınıń menen Ózbekstan Respublikası Prezidenti Shavkat Mirziyoevtiń Qazaqstan Respublikasına ámeliy saparı juwmaqlandı.

ÓzA