28-iyul kúni sırt mámleketlerdiń elimizge jańadan tayınlanǵan elshileri tárepinen isenim jarlıqların tapsırıwǵa baǵıshlanǵan saltanatlı máresim ótkerildi.

Ózbekstan Respublikası Prezidenti Shavkat Mirziyoev ayrıqsha hám tolıq huqıqlı elshiler – Italiya Respublikasınan Guido de Sanktis, Palestina Mámleketinen Vaill Battrexi, Saudiya Arabstanı Patshalıǵınan Saad Abu Xaymid, Kuveyt Mámleketinen Turki Al-Mekrad, Aljir Xalıq Demokratiyalıq Respublikasınan Jamila Ashur, Malayziyadan Rafeda binti Abdul Aziz, Pakistan Islam Respublikasınan Muhammad Mudassir Tip-u, Ázerbayjan Respublikasınan Rashad Mamedov hám Qazaqstan Respublikasınan Erali Tugjanovlardıń isenim jarlıqların qabıl etip aldı.

Mámleketimiz basshısı diplomatiyalıq wákilxanalardıń basshıların Jańa Ózbekstandaǵı abıraylı missiyası baslanǵanı menen shın júrekten qutlıqladı.

Dúnyada túrli geosiyasiy kelispewshilikler barǵan sayın háwij alıp atırǵan házirgi qıyın dáwirde diplomatlardıń juwapkershilikli jumısı hár qashanǵıdan da úlken áhmiyetke iye ekeni atap ótildi.

Prezidentimiz hár bir elshige múrájat etip, olar wákillik etip atırǵan mámleketler menen birge islesiwdi bunnan bılay da keńeytiw boyınsha wazıypalarǵa ayrıqsha toqtap ótti.

Italiya úlken siyasiy hám ekonomikalıq potencialǵa iye áhmiyetli sherik ekeni atap ótilip, “jasıl” energetika, metallurgiya, ximiya, awıl xojalıǵı, densawlıqtı saqlaw, farmacevtika, bilimlendiriw hám turizm tarawlarındaǵı joybarlar ámelge asırılıp atırǵanı, Tashkent qalasında Turin politexnika hám Piza universitetleriniń filialları nátiyjeli jumıs alıp barıp atırǵanı atap ótildi.

Ózbekstan jetekshisi Lombardiya hám Toskana aymaqları menen birge islesiw baylanısları, atap aytqanda, medicina xızmetkerlerin tayarlaw boyınsha birgeliktegi baslamalardı qollap-quwatlaytuǵının bildirdi.

Palestina menen qatnasıqlar ázeliy doslıq ruwxında rawajlanbaqta. Ózbekstan Izrail-Palestina mashqalasın “eki xalıq ushın eki mámleket” principi tiykarında tınısh jol menen sheshiw tárepdarı bolıp kelmekte.

Elimizdiń Tınıshlıq keńesine shólkemlestiriwshi mámleket sıpatında kiriwi Gazanı qayta tiklewge járdemlesiwge qaratılǵanı atap ótildi.

Saudiya Arabstanı menen birge islesiw basqalar ushın úlgi bolmaqta. Mámleketimiz basshısı 25 milliard dollarlıq joybarlar portfeli qálipleskeni, Saudiya rawajlanıw qorı reformalarımızǵa belsene járdem berip atırǵanın ayrıqsha atap ótti.

Qalaberdi, medicina, farmacevtika hám “jasıl” energetika tarawlarında úlken potencial bar ekenligi atap ótildi. Sonday-aq, puqaralarımızǵa Haj hám Umra zıyaratları ushın jaratılıp atırǵan sharayatlar joqarı bahalandı.

Kuveyt penen sawda-ekonomikalıq, investiciya, infrastruktura, densawlıqtı saqlaw hám bilimlendiriw tarawlarında baylanıslardı jańa basqıshqa kóteriw, Kuveyt investiciya agentligi menen neft-ximiya tarmaǵında hám mámleketlik-jeke menshik sheriklik tiykarında joybarlardı ámelge asırıw ushın keń imkaniyatlar bar ekenligi atap ótildi.

Joqarı dárejede erisilgen kelisimlerdiń tolıq orınlanıwı xalıqlarımızdıń máplerine birdey xızmet etetuǵını bildirildi.

Aljir menen sońǵı jıllarda joqarı dárejedegi sóylesiwlerimiz jedelleskeni atap ótildi.

Sonday-aq, neft-gaz, energetika, taw-kán, awıl xojalıǵı hám turizm tarawlarında óz-ara paydalı joybarlardı ámelge asırıw ushın úlken potencial bar ekenligi atap ótildi. Húkimetleraralıq qospa komissiyanı shólkemlestiriw hám Jeńilletilgen sawda kelisimine qol qoyıw áhmiyetli ekenligi atap ótildi.

Malayziya menen qatnasıqlarımız sońǵı jıllarda barlıq baǵdarlarda izbe-iz rawajlanıp barmaqta. Joqarı dárejedegi sóylesiwler jedellesti. Bazarımızǵa usı mámlekettiń jetekshi kompaniyaları jedel kirip kelmekte.

Ózbekstan jetekshisi yarım ótkizgishler, neft-ximiya, islam qarjısı hám zıyarat turizmi tarawlarında birge islesiwdi rawajlandırıw ushın úlken potencial bar ekenligin atap ótti.

Pakistan menen strategiyalıq sheriklik qatnasıqları óz-ara húrmet hám isenim ruwxında rawajlanıp, jańa sapa basqıshına kóterildi.

Tashkent – Karachi jónelisinde tikkeley aviaqatnawlardıń jolǵa qoyılıwı, Transawǵan transport jolı joybarın ámelge asırıw, sanaat kooperaciyası, energetika, awıl xojalıǵı, toqımashılıq, farmacevtika hám turizm tarawlarındaǵı sheriklikti jáne de tereńlestiriw tiykarǵı wazıypa ekeni atap ótildi.

Ázerbayjan menen qatnasıqlar eki mámleket jetekshileriniń isenimli siyasiy erk-ıqrarı sebepli strategiyalıq sheriklik hám awqamlaslıq dárejesine kóterildi. Sawda kólemi 40 procentke artıp, qospa kárxanalardıń sanı derlik 450 ge jetti, júk tasıw kólemi bolsa eki esege ósti.

Ózbekstan hám Ázerbayjan arasındaǵı investiciyalıq portfeldi jaqın keleshekte 10 milliard dollarǵa jetkeriw boyınsha úlken shek alınǵanı málim etildi.

Bolajaq joqarı dárejedegi ushırasıwlar eki tárepleme birge islesiwge jańa pát beretuǵını atap ótildi. Mámleketimiz basshısı Qazaqstan elshisine múrájat etip, ellerimiz arasındaǵı ázeliy doslıq baylanısları bekkemlenip, házirgi waqıtta strategiyalıq sheriklik hám awqamlaslıq qatnasıqları keńeyip atırǵanın atap ótti.

Óz-ara sawda kólemin 10 milliard dollarǵa jetkeriw tiykarǵı maqset ekeni, 8 milliard dollarlıq birgeliktegi investiciyalıq joybarlar portfeli qáliplestirilgeni atap ótildi, “Oraylıq Aziya” xalıqaralıq sanaat kooperaciyası orayın tolıq iske qosıwdan mápdarlıq bildirildi.

Máresim juwmaǵında mámleketimiz basshısı jańadan tayınlanǵan elshilerge maqtanıshlı hám juwapkershilikli diplomatiyalıq jumıslarında úlken tabıslar tiledi. Óz-ara sheriklikti bekkemlew ushın qolaylı sharayatlar jaratıp beriletuǵının atap ótti. Barlıq elshilerdi jeke menshik sektor hám aymaqlar menen belsene islesiwge, orınlardaǵı dóretiwshilik processler menen jaqınnan tanısıwǵa shaqırdı.

Óz gezeginde, diplomatlar shın júrekten qabıllaǵanı hám jaratılǵan imkaniyatlar ushın tereń minnetdarshılıq bildirip, Ózbekstan menen kóp tárepleme birge islesiwdi jedel alǵa qoyıw jolında bar imkaniyatların iske qosatuǵının atap ótti.

ÓzA