Ózbekstan Respublikası Prezidenti Shavkat Mirziyoev hám Belarus Respublikası Prezidenti Aleksandr Lukashenko arasında telefon arqalı sóylesiw bolıp ótti.

Sóylesiw aldınan Belarus jetekshisi mámleketimiz basshısın tuwılǵan kúni menen qızǵın qutlıqlap, oǵan bekkem densawlıq, kúsh-ǵayrat, mámleketshilik jumısında jańa tabıslar, Ózbekstannıń kóp milletli xalqına bolsa tınıshlıq hám abadanlıq tiledi.

Ózbekstan – Belarus strategiyalıq sheriklik qatnasıqların Ózbekstan Prezidentiniń usı jıl 8-9-iyul kúnleri Minsk qalasına ámelge asırǵan rásmiy saparında erisilgen kelisimlerdiń orınlanıwı sheńberinde bunnan bılay da rawajlandırıwdıń áhmiyetli máseleleri kórip shıǵıldı.

Hár qıylı dárejelerde nátiyjeli sóylesiwler alıp barılıp atırǵanı qanaatlanıwshılıq penen atap ótildi. Óz-ara tovar almasıw kólemi turaqlı ósip barmaqta. Tiykarǵı tarawlarda kooperaciya joybarları ámelge asırılmaqta.

Jedel túrge engen aymaqlararalıq birge islesiw hám mádeniy-gumanitarlıq almasıwlardı dawam ettiriw áhmiyetli ekenligi atap ótildi.

ÓzA