Ózbekstan Respublikası Prezidenti Shavkat Mirziyoev Iran Islam Respublikası Prezidenti Masud Pezeshkiyan menen telefon arqalı sóylesti.

Sóylesiw aldınan Iran Prezidenti mámleketimiz basshısın tuwılǵan kúni menen qızǵın qutlıqlap, bekkem densawlıq, shańaraqlıq baxıt-ıǵbal hám juwapkershilikli jumısında jańa tabıslar tiledi.

Ózbekstan jetekshisi Jaqın Shıǵıs regionında keskinlik dawam etip atırǵanınan ayrıqsha qáweterlenip, házirgi waqıtta salmaqlılıqtı saqlaw hám sóylesiwdi qayta tiklew hár qashanǵıdan da áhmiyetli ekenin ayrıqsha atap ótti.

Telefon arqalı sóylesiw dawamında eki tárepleme birge islesiwdi jáne de rawajlandırıw, atap aytqanda, sawda-ekonomikalıq, investiciyalıq, transport hám mádeniy-gumanitarlıq tarawlardaǵı baylanıslardı keńeytiwge kelisip alındı.

Ózbekstan hám Iran jetekshileri kún tártibindegi basqa da máseleler boyınsha pikir alıstı.