Ózbekstan Respublikası Prezidenti Shavkat Mirziyoevtıń Qırǵız Respublikası Prezidenti Sadir Japarov penen telefon arqalı sóylesiwi bolıp ótti.

Qırǵızstan basshısı mámleketimiz basshısın tuwılǵan kúni múnásibeti menen qızǵın qutlıqlap, oǵan shın júrekten bekkem densawlıq, baxıt-ıǵbal hám úlken tabıslar, al tuwısqan Ózbekstan xalqına tınıshlıq hám rawajlanıw tiledi.

Sadir Japarov Ózbekstanda ámelge asırılıp atırǵan keń kólemli reformalardı hám Shavkat Mirziyoevtiń eki el arasındaǵı doslıq, jaqsı qońsıshılıq hám strategiyalıq sheriklik qatnasıqların bekkemlewge qosqan jeke úlesin joqarı bahaladı.

Barlıq baǵdarlarda óz-ara paydalı birge islesiw pátiniń barǵan sayın artıp atırǵanı qanaatlanarlıq penen atap ótildi. Óz-ara sawda kólemi jedel pát penen óspekte, sanaat kooperaciyası joybarları, sonıń ishinde, iske qosılǵan Birlesken fond sheńberinde ámelge asırılmaqta. Iri regionlıq infrastruktura joybarları boyınsha ámeliy jumıslar dawam ettirilmekte.

Aldaǵı joqarı dárejedegi sammittiń kún tártibin, bárinen burın, sawda-ekonomikalıq tarawda puqta tayarlawdıń áhmiyetliligi atap ótildi.