Ózbekstan Respublikası Prezidenti Shavkat Mirziyoev 24-iyul kúni Tájikstan Respublikası Prezidenti Emomali Rahmon menen telefon arqalı sóylesti.

Tájikstan jetekshisi mámleketimiz basshısın tuwılǵan kúni menen qızǵın qutlıqlap, oǵan bekkem densawlıq, baxıt-ıǵbal, dos Ózbekstan xalqınıń arzıw-niyetlerin ámelge asırıw jolında tawsılmas kúsh-ǵayrat hám jańa tabıslar tiledi.

Emomali Rahmon Ózbekstan Prezidentiniń háreketleri sebepli búgin elimiz sociallıq-ekonomikalıq rawajlanıw jolınan isenimli ilgerilep, xalıqaralıq maydandaǵı abırayın izbe-iz bekkemlep atırǵanın ayrıqsha atap ótti.

Sóylesiwde Ózbekstan menen Tájikstan arasındaǵı doslıq, jaqsı qońsıshılıq, strategiyalıq sheriklik hám awqamlaslıq qatnasıqların bunnan bılay da rawajlandırıw máseleleri kórip shıǵıldı.

Tárepler Tájikstan Prezidentiniń usı jıl 26-27-mart kúnleri Ózbekstanǵa mámleketlik saparı dawamında, bárinen burın, sawda-ekonomikalıq hám investiciyalıq tarawlarda erisilgen kelisimlerdi ámelge asırıw máselelerine ayrıqsha itibar qarattı.

Jetekshiler regionallıq kún tártibindegi máseleler boyınsha da pikir alıstı, bolajaq ushırasıwlardıń rejesin dodaladı.

ÓzA