Ózbekstan Respublikası Prezidenti Shavkat Mirziyoev 24-iyul kúni Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov penen telefon arqalı sóylesti.

Túrkmenstan milliy jetekshisi mámleketimiz basshısın tuwılǵan kúni menen qızǵın qutlıqlap, oǵan bekkem densawlıq, baxıt-ıǵbal hám úlken tabıslar, tuwısqan Ózbekstan xalqına bolsa tınıshlıq-tatıwlıq hám rawajlanıw tiledi.

Sonday-aq, Túrkmenstan Prezidenti Serdar Berdimuhamedovtıń sálemin hám eń jaqsı tileklerin jetkerdi.

Gurbanguli Berdimuhamedov Prezidentimizdiń tınımsız miyneti hám uzaqtı gózlep júrgizip atırǵan siyasatı sebepli Ózbekstan jańa sheklerdi iyelep atırǵanın, sociallıq-ekonomikalıq hám siyasiy tarawlarda salmaqlı rawajlanıwǵa erisip atırǵanın ayrıqsha atap ótti.

Sóylesiwde joqarı dárejede erisilgen kelisimlerdi ámelge asırıw sheńberinde Ózbekstan-Túrkmenstan doslıq, jaqsı qońsıshılıq hám strategiyalıq sheriklik qatnasıqların bunnan bılay da bekkemlewdiń áhmiyetli máseleleri kórip shıǵıldı.

Óz-ara isenim hám ulıwma máplerdi esapqa alıw principlerine tiykarlanǵan kóp tárepleme birge islesiwdiń páti artıp baratırǵanı úlken qanaatlanıwshılıq penen atap ótildi.

Barlıq dárejelerde jedel sóylesiwler dawam ettirilmekte. Jaqında Ashxabadta ótken siyasiy másláhátlesiwlerdiń nátiyjeli juwmaqları joqarı bahalandı.

Óz-ara tovar almasıw hám júk tasıw kólemi jedel ósip barmaqta. “Shavat-Tashawız” sawda zonasınıń nátiyjeli jumısı da óz-ara sawda kólemin arttırıwǵa xızmet etpekte.

Energetika, sanaat, awıl hám suw xojalıǵı, transport tarawlarında kooperaciya joybarları tabıslı ámelge asırılmaqta. Parlamentleraralıq, aymaqlararalıq, isbilermenlik hám mádeniy-gumanitarlıq almasıwlardı jáne de keńeytiw áhmiyetli ekenligi atap ótildi.

Regionallıq kún tártibin, sonıń ishinde, usı jıldıń gúzinde Avaza qalasında ótkeriletuǵın Oraylıq Aziya hám Ázerbayjan mámleket basshılarınıń gezektegi Másláhát ushırasıwına tayarlıq kóriw sheńberinde muwapıqlastırıw hám alǵa qoyıwǵa ayrıqsha itibar qaratıldı.

ÓzA