Ózbekstan Respublikası Prezidenti Shavkat Mirziyoev 20-iyul kúni Belarus Respublikası Bas ministriniń orınbasarı Viktor Karankevich basshılıǵındaǵı delegaciyanı qabılladı.

Ushırasıw aldınan joqarı mártebeli miyman mámleketimiz basshısına Belarus Prezidenti Aleksandr Lukashenkonıń qızǵın sálemin hám jaqsı tileklerin jetkerdi.

Ózbekstan menen Belarus arasındaǵı strategiyalıq sheriklik qatnasıqların bunnan bılay da keńeytiwdiń áhmiyetli máseleleri kórip shıǵıldı.

Mámleketimiz jetekshisiniń usı jıl 8-9-iyul kúnleri Minsk qalasına ámelge asırǵan rásmiy saparı, bárinen burın, sawda-ekonomikalıq tarawda úlken nátiyjeler bergeni qanaatlanıwshılıq penen atap ótildi.

Tovar almasıwdıń kólemin 2 milliard dollarǵa jetkeriw hám ekonomikanıń tiykarǵı tarmaqlarında kooperaciyalıq joybarlardı alǵa qoyıw maqsetinde qabıl etilgen ilajlar rejesin óz waqtında ámelge asırıw áhmiyetli ekenligi atap ótildi.

Elimizde birinshi atom elektr stanciyası hám túrles infrastrukturanı qurıwda Belarus tájiriybesinen paydalanıw máselelerine ayrıqsha itibar qaratıldı.

Bolajaq atom elektr stanciyasın joybarlastırıw, qurıw hám ekspluataciyalaw processlerin ekspertlik jaqtan qollap-quwatlaw, taraw ushın milliy kadrlardı tayarlaw jáne tiyisli joqarı bilimlendiriw mákemeleri arasında birgeliktegi baǵdarlamalardı jolǵa qoyıw solardıń qatarına kiredi.

ÓzA