Húrmetli Prezidentimizdiń tapsırması menen Qaraqalpaqstannıń bir qatar rayonların sociallıq, ekonomikalıq jaqtan rawajlandırıw, xalıqtıń abadan turmısın támiyinlew maqsetinde respublika wálayatları biriktirilgen edi. Usı tiykarda wálayatlar menen birge bir qatar jumıslar ámelge asırıldı.

Samarqand wálayatı hákimi A.Boboev basshılıǵındaǵı delegaciya Qaraqalpaqstanǵa keldi. Miymanlardı Ministrler Keńesiniń Baslıǵı F.Ermanov kútip aldı.
Bunnan soń Nókis rayonı aymaǵındaǵı “Inter Agro broylerler Nókis” kárxanasınıń ashılıw máresimi bolıp ótti.

Ashılıw saltanatına Qaraqalpaqstan Respublikası Ministrler Keńesiniń Baslıǵı F.Ermanov, Samarqand wálayatı hákimi A.Boboev, Nókis rayonı hákimi Z.Zaytov hám keń jámiyetshilik wákilleri qatnastı.

Onda shıǵıp sóylegenler jıynalǵanlardı jańa kárxananıń ashılıwı múnásibeti menen qutlıqladı hám kárxana jumısları menen jaqınnan tanıstı.

Aytıp ótiw orınlı, ulıwma 7 mln. dollar qarjı tiykarında jańadan qurılıp, paydalanıwǵa tapsırılǵan kárxanada 40 jańa jumıs ornı jaratılǵan bolıp, bul kárxana tiykarınan máyek jetistiriwge qánigelesken. Házirgi kúnde máyek qońsı wálayatlarǵa hám sırt elge eksport etilmekte.

Bunnan soń miymanlar “Aziya metall prof” kárxanası tárepinen ámelge asırılıp atırǵan metall profillerin islep shıǵarıwdı shólkemlestiriw joybarın barıp kórdi.

Sonday-aq, “Shoxjaxon universal fuds” JShJ tárepinen shólkemlestirilgen sawda orayınıń jumısları da kózden ótkerildi. Isbilermenler ushın jaratılǵan imkaniyatlar tiykarında jańa baslamalardıń sanı artıp, jańadan-jańa jumıs orınları jaratılıp atırǵanı atap ótildi.

Miymanlardıń keyingi mánzili rayondaǵı oraylıq kitapxana boldı. Bul jerde jaslar hám kitapxanalar ushın jaratılǵan sharayatlar kózden ótkerildi. Sonıń menen birge, rayonlıq kóp tarmaqlı medicina mákemesine wálayat hákimligi atınan arnawlı ásbap-úskeneler tapsırıldı. Ámelge asırılǵan jumıslar menen tanısıw barısında rayon hákimliginde shólkemlestirilgen muzey jumısı kózden ótkerildi.

Aytıp ótiw orınlı, doslıq, tatıwlıq hám awızbirshilikke tiykarlanǵan bunday ilajlar xalqımızdıń turmıs abadanlıǵın arttırıwǵa xızmet etetuǵını sózsiz.

Qaraqalpaqstan xabar agentligi