Prezident Shavkat Mirziyoevqa janılǵı-energetika tarawında puqaralardıń múrájatların kórip shıǵıw hám olarda kóterilgen máselelerdı gúzgi-qısqı máwsimge tayarlıq sheńberinde saplastırıw boyınsha maǵlıwmat berildi.

Xalıqtı elektr energiyası hám gaz benen turaqlı támiyinlewde puqaralardıń múrájatların talqılaw, olar tiykarında orınlardaǵı mashqalalardı anıqlap, mánzilli ilajlar kóriw áhmiyetli.

2026-jıldıń birinshı yarımında janılǵı-energetika tarawına baylanıslı 39 mıń 220 múrájat kelip túsken. Bul ótken jıldıń sáykes dáwirine salıstırǵanda 13 mıń 820 yamasa 26,1 procentke kem.

Olardıń 50 procenti tábiyiy hám suyıltırılǵan gazge, 38,3 procenti elektr támiynatına baylanıslı.

Múrájatlarda tiykarınan suyıltırılǵan gaz ballonların toltırıw, elektr támiynatındaǵı úzilisler, elektr tarmaqların qurıw hám ońlaw jáne tábiyiy gaz basımı menen baylanıslı máseleler kóterilgen.

Múrájatlardıń ulıwma sanı azayǵanına qaramastan, hár bir múrájattı jeke jaǵday sıpatında emes, al belgili bir aymaq, tarmaq yamasa xızmettegi mashqalanı kórsetetuǵın áhmiyetli signal sıpatında úyreniw zárúrligi atap ótildi.

Gúzgi-qısqı máwsim aldınan tákirar múrájatlar kelip túsip atırǵan máhálle hám obektlerdi xatlawdan ótkeriw, elektr hám gaz tarmaqlarınıń texnikalıq jaǵdayın úyreniw, anıqlanǵan kemshiliklerdi saplastırıw boyınsha aymaqlar kesiminde mánzilli rejeler islep shıǵıw wazıypası qoyıldı.

Ásirese, elektr támiynatında úzilisler kóp baqlanıp atırǵan aymaqlarda tarmaq hám transformatorlardı ońlaw, avariyalıq brigadalardıń tayarlıǵın arttırıw, tábiyiy gaz basımı menen baylanıslı mashqalalar bar orınlarda támiynattıń turaqlılıǵın támiyinlew áhmiyetliligi atap ótildi.

Sonıń menen birge, suyıltırılǵan gaz ballonların toltırıw hám xalıqqa jetkerip beriw grafiklerine qatań ámel etiw, talap joqarı bolǵan aymaqlarda qosımsha rezerv hám imkaniyatlardan paydalanıw zárúrligi kórsetip ótildi.

Mámleketimiz basshısı juwapkerlerge múrájatlarda kóterilgen sistemalı mashqalalardı gúzgi-qısqı máwsimi baslanǵanǵa shekem sheshiw, bul boyınsha jergilikli hákimlikler, «máhálle jetiligi» hám kommunallıq xızmet kórsetiwshı shólkemler menen birgelikte sistemalı jumıs alıp barıw zárúrligine itibar qarattı.

Máwsimge tayarlıq jumısların múddetinde hám sapalı juwmaqlaw, xalıq jáne sociallıq taraw obektlerine tábiyiy hám suyıltırılǵan gaz, sonıń menen birge, basqa da janılǵı resursların turaqlı jetkerip beriw boyınsha tiyisli kórsetpeler berdi.

ÓzA