Nókis qalasındaǵı 1-sanlı sport mektebinde «Máhálle ligası» sport jarıslarınıń Qaraqalpaqstan Respublikalıq basqıshı juwmaqlandı.

Bul jarıslardı ótkeriwden maqset – máhállelerde ǵalabalıq sporttı bunnan bılay da rawajlandırıw, puqaralardıń fizikalıq belsendiligin arttırıw, salamat turmıs tárizin qáliplestiriw hám sport arqalı xalıqtıń arasında doslıq hám awızbirshilik ortalıǵın bekkemlew bolıp esaplanadı.

Máhállelerde jasaytuǵın 30 jastan joqarı bolǵan puqaralar arasında ótkerilgen usı jarıstıń juwmaqlawshı basqıshında qala hám rayonlardan kelgen qatnasıwshılar sporttıń shaxmat, shashka, kishi futbol, voleybol, stritbol, vorkaut hám stol tennisi túrleri boyınsha óz-ara bellesip, sport sheberligin, fizikalıq tayarlıǵın hám jeńiske bolǵan umtılısın kórsetti.

Sıylıqlaw máresiminde Ózbekstan Máhálleler awqamı Qaraqalpaqstan Respublikası basqarmasınıń baslıǵı S.Turmanov hám tiyisli shólkem wákilleri qatnasıp, hár bir sport túri boyınsha jeńimpaz hám sıylı orın iyelerine jarıs shólkemlestiriwshileri tárepinen tayarlanǵan diplomlar, bahalı sawǵalar hám kuboklar saltanatlı túrde tapsırıldı.

Qaraqalpaqstan xabar agentligi