Salıq basqarmasınıń maǵlıwmatlarına qaraǵanda, búgingi kúnde Qaraqalpaqstan Respublikasında 4038 yuridikalıq táreptiń óz waqtında tólenbegen salıq qarızdarlıǵı 333,4 milliard sumdı quramaqta.

Sol sebepli aymaqta salıq xızmeti uyımları, Májbúriy orınlaw byurosı, Jol háreketi qáwipsizligi xızmetkerleri menen birgelikte qarızdar kárxanalardıń múlklerin xatlaw jumısları alıp barılmaqta.

Sonıń ishinde, qarızdar kárxanalardıń salıq qarızı ushın avtotransport quralları xatlawǵa alındı. Eger qarızdarlıq belgilengen múddette tólenbese, bul imarat hám avtomashinalar elektron aukcion arqalı satılıp, qarızdarlıq mámleketlik byudjetke óndiriledi.

Jıl basınan berli birgelikte alıp barılǵan jumıslar nátiyjesinde 421 kárxananıń 81,0 milliard sumlıq salıq qarızdarlıǵı esabınan olarǵa tiyisli múlk xatlawǵa alındı.

Nátiyjede kárxanalar tárepinen 51,1 milliard sumlıq salıq qarızı tólep berildi.

Qaraqalpaqstan xabar agentligi