Qaraózek rayonında «Paxta jetistiriwde áhmiyetli 30 kúnlik» sheńberinde ǵawasha tárbiyasında agrotexnikalıq ilajlardı óz waqtında hám sapalı ámelge asırıw máselelerine baǵıshlanǵan atız seminarı shólkemlestirildi.

Seminarǵa «Ózagroinspekciya»nıń Qaraqalpaqstan Respublikası basqarması baslıǵı E.Qayıpbergenov, Ósimlikler karantini hám qorǵaw agentliginiń baslıǵı Dj.Xudaybergenov, rayon hákimi A.Baymuratov, awıl xojalıǵı tarawınıń qánigeleri, fermer xojalıqlarınıń basshıları hám tiyisli shólkemlerdiń wákilleri qatnastı.

Ilaj dawamında ǵawashanıń vegetaciya dáwirinde ámelge asırılıwı zárúr bolǵan agrotexnikalıq ilajlar, atap aytqanda, suwǵarıw, kultivaciyalaw, azıqlandırıw, zıyankesler menen keselliklerge qarsı gúresiw jáne ósimliklerdi biologiyalıq hám ximiyalıq qorǵaw máseleleri boyınsha ámeliy usınıslar berildi.

Sonday-aq, atız sharayatında ǵawashanı tárbiyalawda jol qoyılıwı múmkin bolǵan kemshilikler dodalanıp, ónimdarlıqtı arttırıw hám sapalı paxta jetistiriw ushın agrotexnikalıq ilajlardı belgilengen múddetlerde orınlawdıń áhmiyetli ekenligi atap ótildi.

Seminarda qatnasıwshılardıń da pikir-usınısları tıńlanıp, olar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.