Qaraqalpaqstan Respublikası Bajıxana basqarması Kontrabandaǵa qarsı gúresiw bóliminiń xızmetkerleri tárepinen Mámleketlik qáwipsizlik xızmeti, Ishki isler uyımları hám Milliy gvardiya xızmetkerleri menen birgelikte náshebentlik zatlardıń nızamsız aylanısına qarsı qaratılǵan gezektegi operativ ilaj ámelge asırıldı.

Ilaj dawamında Nókis qalası aymaǵında háreketlenip kiyatırǵan puqara belgilengen tártipte toqtatılıp, qalıslardıń qatnasıwında jeke tekseriwden ótkerildi.

Tekseriw procesinde bul shaxsqa tiyisli qara reńdegi qol sumkası kózden ótkerilgende, onıń ishinde 16 dana shırpı qutısına jasırılǵan, jámi qadaǵı menen salmaǵı 77,56 gramm bolǵan «marixuana» náshebentlik quralı bar ekenligi anıqlandı.

Házirgi waqıtta bul jaǵday boyınsha Bajıxana basqarması tárepinen Ózbekstan Respublikası Jınayat kodeksiniń tiyisli statyaları tiykarında jınayat isi qozǵatılıp, tergew háreketleri alıp barılmaqta.

Qaraqalpaqstan xabar agentligi