Prezident Shavkat Mirziyoev qábiletli basqarıwshılar, liderler hám jańa áwlad basshıların anıqlaw hám tańlaw jáne “El-yurt umidi” qorı arqalı qábiletli jaslardı qollap-quwatlaw ilajları boyınsha prezentaciya menen tanıstı.

Búgingi kúnde Ózbekstan intellektuallıq potencial hám joqarı texnologiyalarǵa tiykarlanǵan jańa rawajlanıw basqıshına ótpekte. Elimizge hár jılı 50 milliard dollardan aslam investiciya kirip kelmekte, eksport kólemi 40 milliard dollarǵa shamalaspaqta, zamanagóy kárxanalar iske qosılmaqta.

Bunday sharayatta professional mámleketlik xızmet hám básekige shıdamlı ekonomika ushın zárúr kadrlardı aldınnan tayarlaw strategiyalıq áhmiyetke iye.
Sońǵı jıllarda mámleketlik basqarıwda kadrlardı tańlaw hám bahalaw sisteması izbe-iz sanlastırıldı. Birinshi márte 87,7 mıń mámleketlik xızmetkerdiń birden-bir elektron maǵlıwmatlar bazası qáliplestirildi. Mámleketlik xızmetke qabıllaw ashıq tańlaw tiykarında, talabanlardıń bilim hám kónlikpelerin insan faktorısız bahalaw arqalı ámelge asırılmaqta.

Prezentaciyada jasalma intellekt járdeminde tarmaqlar hám aymaqlardıń drayver tarawları tallanıp, 50 den aslam zamanagóy kásip boyınsha basqarıw kadrlarına talap bar ekenligi anıqlanǵanı atap ótildi. Ásirese, energetika hám “jasıl” texnologiyalar, qurılıs hám urbanizaciya, awıl hám suw xojalıǵı, sanlastırıw hám xızmet kórsetiw baǵdarlarında maman qánigelerge talap joqarı.

Mámleketimiz basshısı tayar kadrlar bazası bolmasa, basqarıw sistemasında úzilisler júzege keliwin, jumıs nátiyjeliligi hám qararlardıń sapası tómenleytuǵının atap ótti.

Kadrlardı bahalawda eski “obektivka” usılınan waz keship, talabannıń bilimin, kásiplik tájiriybesin, psixologiyalıq ózgesheliklerin, strategiyalıq pikirlewin hám jetekshilik qábiletin qamtıp alatuǵın portfolio sistemasına ótiw zárúr ekenligi kórsetip ótildi.

Jańa tártipke bola, perspektivalı basqarıwshılar sanlı texnologiyalar tiykarında 100 ballıq norma boyınsha bahalanadı. Úlken maǵlıwmatlar hám biznes-analiz quralları arqalı joqarı potenciallı kadrlar anıqlanıp, olar ushın jasalma intellekt járdeminde individual kásiplik rawajlanıw rejeleri islep shıǵıladı. Bul sistemanı dáslep awıl xojalıǵı, joqarı bilimlendiriw hám qurılıs tarawlarında sınaqtan ótkeriw usınıs etildi.

Hár eki jılda 500 perspektivalı basqarıwshını tańlap alıw, usı tárizde 2030-jılǵa shekem 1,5 mıń joqarı potenciallı qánigeden ibarat jańa áwlad basshı kadrlar rezervin jaratıw rejelestirilgen.

Prezentaciyada basshılıq lawazımları ushın rezervti ashıq-aydın qáliplestiriwge qaratılǵan “TOP-100” ashıq tańlawın ótkeriw mexanizmi de aytıp ótildi. Tańlaw agrar taraw, densawlıqtı saqlaw, isbilermenlik, sud-huqıq, bilimlendiriw, málimleme texnologiyaları hám jasalma intellekt baǵdarların qamtıp aladı.

Talabanlar test, kompleksli kásiplik bahalaw hám sóylesiw basqıshlarınan ótedi. Jeńimpazlar arnawlı oqıw kurslarında tayarlanıp, milliy kadrlar rezervine kirgiziledi, olardıń kásiplik ósiwi hám basshılıq lawazımlarına tayınlanıwı boyınsha mánzilli ilajlar kóriledi.

Milliy kadrlar rezervin qáliplestiriwde sırt eldegi watanlaslar, sonday-aq, dúnyanıń eń abıraylı 100 universitetin tamamlaǵan hám olarda bilim alıp atırǵan jaslardıń potencialınan nátiyjeli paydalanıw áhmiyetli ekenligi atap ótildi.

Bul baǵdarda 2026-jıl 1-oktyabrden career.edu.uz platformasında “Shet eldegi studentler” modulin iske qosıw rejelestirilgen. Ol arqalı sırt elde bilim alıp atırǵan jaslar mámleketlik uyımlar hám jeke menshik kárxanalarǵa biriktiriledi, olardıń ámeliyat ótewi, jumıs beriwshiler menen sóylesiwi hám keleshekte jumısqa tartılıwı támiyinlenedi.

Májiliste “El-yurt umidi” qorınıń jumısın jetilistiriw máselelerine de itibar qaratıldı. Ótken jılı qor transformaciyalanǵanı nátiyjesinde dúnyanıń eń abıraylı 100 joqarı oqıw ornınıń studenti bolǵan stipendiatlardıń úlesi 30 procentten 80 procentke jetti. Keyingi jılı jańa tártip tiykarında ótkerilgen úsh tańlawda 447 qábiletli jas stipendiya iyesi boldı.

Sonıń menen birge, qor baǵdarlamaların aymaq hám tarmaqlardıń anıq talaplarına baylanıstırıw zárúr ekenligi kórsetip ótildi.

Qábiletli jaslardı sırt el universitetlerinde mánzilli tayarlaw, oqıw qárejetlerin iri kárxanalar menen birgelikte qarjılandırıw, abıraylı sırt el joqarı oqıw orınları menen birgeliktegi baǵdarlamalardı jolǵa qoyıw boyınsha usınıslar bildirildi.

Sonday-aq, pitkeriwshilerdiń ilimiy izertlewleri, startapları hám reformalarǵa qaratılǵan baslamaların kishi grantlar arqalı qollap-quwatlaw, joqarı buwın basshıları ushın Singapur, Malayziya, Ullı Britaniya hám Yaponiya tájiriybesi tiykarında jetekshilik baǵdarlamaların shólkemlestiriw rejeleri kórip shıǵıldı.

Prezidentimiz kadrlardı tańlawda ashıq-aydınlıqtı hám qalıslıqtı támiyinlew, qábiletli qánigelerdi sistemalı túrde qollap-quwatlaw jáne olardıń potencialınan mámlekettiń rawajlanıwı jolında nátiyjeli paydalanıw boyınsha juwapkerlerge tapsırmalar berdi.

ÓzA