Ózbekstan Respublikası Prezidenti Shavkat Mirziyoev Qatar Mámleketiniń burınǵı Ámiri Shayx Hamad bin Xalifa Ol Soniydiń qaytıs bolıwı múnásibeti menen kewil bildiriw ushın 14-iyul kúni Doxa qalasında boldı.

Hamad xalıqaralıq aeroportında mámleketimiz basshısın Qatar Bas ministriniń orınbasarı, qorǵanıw ministri Shayx Saud bin Abdulrahmon Ol Soniy hám basqa da rásmiy shaxslar kútip aldı.

Usı kúni Lusail sarayında Ózbekstan Respublikası Prezidenti Shavkat Mirziyoev Qatar Mámleketi Ámiri Shayx Tamim bin Hamad Ol Soniy menen ushırastı.

Sóylesiw aldınan mámleketimiz basshısı Qatar Ámirine ákesi – burınǵı Ámir Shayx Hamad bin Xalifa Ol Soniydiń qaytıs bolǵanı múnásibeti menen tereń qayǵırıw menen kewil bildirdi.

Shayx Hamad Ol Soniy Háziretleri Qatar Mámleketi erisken kóplegen tariyxıy jetiskenlikler, úlken dóretiwshilik jumısları, sociallıq-ekonomikalıq turmıstaǵı jedel reformalar, mámlekettiń xalıqaralıq maydandaǵı abırayınıń artıwına úlken úles qosqan siyasatshı bolǵanı atap ótildi.

Sonıń menen birge, ol insannıń ellerimiz arasındaǵı jaqın doslıq hám kóp táreplemeli birge islesiwdi rawajlandırıw jáne bekkemlewdegi nátiyjeli miynetleri ayrıqsha atap ótildi.

Sonday-aq, Prezidentimiz Qatar búgingi kúnde regionda tınıshlıq hám turaqlılıqtı támiyinlewde áhmiyetli orın iyelep atırǵanı, xalıqaralıq maydanda úlken tásirge iye “Doxa hawazı” payda bolǵanın atap ótti.

Eki mámleket jetekshileri Ózbekstan hám Qatar arasındaǵı strategiyalıq sheriklikti bunnan bılay da bekkemlew, kóp táreplemeli baylanıslardı jańa basqıshqa kóteriw, áhmiyetli xalıqaralıq hám regionallıq máselelerdi dodaladı.

Óz gezeginde, Qatar Ámiri Ózbekstan Prezidentine usı sınawlı demlerde jeke ózi kelip, shın júrekten kewil bildirgeni hám doslıq qollap-quwatlaǵanı ushın tereń minnetdarshılıq bildirdi.

Ushırasıw juwmaǵında Ózbekstan basshısı Qatar Ámiriniń ózine qolaylı bolǵan waqıtlarda elimizge sapar menen keliwge mirát etti.

Sonıń menen Ózbekstan Respublikası Prezidenti Shavkat Mirziyoevtiń Qatar Mámleketine saparı juwmaqlandı.

ÓzA