Ózbekstan Respublikası Prezidenti Shavkat Mirziyoev 14-iyul kúni elimizge ámeliy sapar menen kelgen Italiyanıń Toskana wálayatınıń gubernatorı Eujenio Jani basshılıǵındaǵı delegaciyanı qabılladı.

Ózbekstan – Italiya strategiyalıq sherikligin, bárinen burın, sawda-ekonomikalıq, investiciyalıq hám mádeniy-gumanitarlıq tarawlarda jáne de rawajlandırıw máseleleri kórip shıǵıldı. Aymaqlararalıq birge islesiwdi keńeytiwge ayrıqsha itibar qaratıldı.

Barlıq dárejelerde eki tárepleme sóylesiwler jedelleskeni hám birge islesiwdiń tiykarǵı kórsetkishleri izbe-iz ósip atırǵanı qanaatlanıwshılıq penen atap ótildi. Usı jıldıń basınan berli óz-ara sawda kólemi 25 procentke arttı. Ózbekstanda metallurgiya, energetika, awıl xojalıǵı, ximiya sanaatı hám ekonomikanıń basqa da tarmaqlarında Italiyanıń jetekshi kompaniyalarınıń qatnasıwında joybarlar tabıslı ámelge asırılmaqta.

Ózbekstan hám Toskananı kóp ásirlik tariyxıy hám mádeniy baylanıslar baylanıstırıp turatuǵını atap ótildi. Ullı jipek jolı dáwirinde Florenciya menen Ózbekstannıń áyyemgi qalaları arasında jedel sawda-satıq islengen, florenciyalı sawdager hám diplomatlar bolsa Ámir Temur sarayında qabıl etilgen.

Búgingi kúnde Tashkent qalasında Piza universitetiniń filialı tabıslı jumıs alıp barmaqta. Usı jılı bul filial miynet bazarına dáslepki pitkeriwshilerdi shıǵaradı. Prato qalasında elimizdiń toqımashılıq ónimleri sawda úyi jumıs islemekte. 2024-jılı Florenciyadaǵı Uffici galereyasında elimizdiń avangard kórkem óneri shıǵarmalarınıń kórgizbesi shólkemlestirildi.

Toskana wálayatı menen toqımashılıq, bılǵarı ayaq-kiyim, azıq-awqat hám zergerlik sanaatı, qurılıs hám bilimlendiriw, mádeniyat hám turizm tarawlarında birge islesiwdi rawajlandırıw úlken potencialǵa iye ekeni atap ótildi.

Toskana hám Buxara wálayatı arasında sheriklik baylanıslarınıń rawajlanıp atırǵanı hám birge islesiw haqqındaǵı kelisimge qol qoyılǵanı joqarı bahalandı.
Ushırasıw juwmaǵında Toskana menen mámleketimiz aymaqları arasındaǵı birge islesiwdi bunnan bılay da rawajlandırıwǵa qaratılǵan jańa joybar hám baslamalardı ámelge asırıwdı názerde tutatuǵın birgeliktegi “jol kartası”n tayarlaw hám qabıl etiw haqqında kelisimge erisildi.

Toskana Italiyanıń eń ekonomikalıq rawajlanǵan aymaqlarınıń qatarına kiredi hám kúshli sanaat potencialı, joqarı texnologiyalı óndiris, zamanagóy awıl xojalıǵı, dúnyaǵa belgili vinoshılıq hám turizm tarmaǵına iye.

Wálayattıń hákimshilik orayı – Florenciya bolsa jáhán mádeniyatı, ilimi hám kórkem óneriniń rawajlanıwına úlken úles qosqan Oyanıw dáwiriniń ulıwma tán alınǵan “besigi” bolıp esaplanadı.

ÓzA