Prezident Shavkat Mirziyoev elektropoezdda Tashkentten Bekabad qalasına keldi.

Mámleketimiz basshısınıń 2025-jıl 27-dekabrde qabıl etilgen “2030-jılǵa shekem temir jol transportında jergilikli jónelislerde jolawshı tasıw kórsetkishlerin arttırıw ilajları haqqında”ǵı qararı tiykarında aymaqlarda transport infrastrukturası jańalanıp, jergilikli qatnawlar keńeytilmekte. Nátiyjede xalıq ushın qolaylı hám sapalı transport xızmetleri jolǵa qoyılmaqta.

Bekabad vokzalında Prezidentimiz paytaxt hám usı qalanı baylanıstırıwshı jóneliste ámelge asırılǵan jumıslar haqqında málimleme berildi.

192 kilometrlik “Tashkent – Bekabad” temir jol qatnawı kúnine derlik mıń, jılına bolsa 300 mıń jolawshıǵa xızmet kórsetiwi rejelestirilgen. Endi onda altı vagonnan ibarat, 586 jolawshıǵa mólsherlengen elektropoezd saatına 120 kilometrge shekemgi tezlikte háreketlenedi. Bul, ásirese, hár kúni jumıs hám oqıwǵa qatnaytuǵın puqaralar ushın qosımsha qolaylıq jaratadı.

Elektropoezdda jolawshılar ushın barlıq zárúr sharayatlar jaratılǵan. Atap aytqanda, mayıplıǵı bolǵan shaxslar ushın arnawlı kótergishler ornatılǵan. Vagonlar kondicioner hám ısıtıw sistemaları, jumsaq orınlıqlar, USB quwatlaw noqatları hám Wi-Fi tarmaǵı menen úskenelengen. Sonday-aq, videobaqlaw sistemaları, elektron málimleme tabloları hám velosipedler ushın arnawlı orınlar bar.

Tez júrer elektropoezdtıń qatnawǵa qoyılıwı avtomobil jollarındaǵı transport júgin azaytıw hám ekologiyalıq taza transport úlesin arttırıwǵa xızmet etedi.

Prezidentimiz temir jol infrastrukturasın bunnan bılay da rawajlandırıw, jolawshılar ushın sharayatlardı jaqsılaw, tarmaqlardı elektrlestiriw hám temir jollarǵa tutas aymaqlardı abadanlastırıw boyınsha juwapkerlerge tiyisli tapsırmalar berdi.

Sonday-aq, mámleketimiz basshısı vokzal infrastrukturası, xızmet kórsetiwdiń sapası hám jolawshılar háreketin nátiyjeli shólkemlestiriw máselelerine ayrıqsha itibar qarattı.

ÓzA