Ózbekstan Respublikası Prezidenti Shavkat Mirziyoev Islam civilizaciyası I Xalıqaralıq forumında qatnasıw ushın elimizge kelgen Islam dúnyası bilimlendiriw, ilim hám mádeniyat shólkemi (ICESCO) niń bas direktorı Salim al-Malikti qabılladı.

Ózbekstan hám Islam birge islesiw shólkeminiń bul abıraylı institutı arasında kóp táreplemeli sheriklikti bunnan bılay da keńeytiw máseleleri kórip shıǵıldı.

Xalıqaralıq struktura menen ámeliy birge islesiw izbe-iz rawajlanıp atırǵanı qanaatlanıwshılıq penen atap ótildi.

Ózbekstan xalıqaralıq islamtanıw akademiyasında ICESCO kafedrası jumıs alıp barmaqta. Usı jılı Tashkentte shólkemniń ofisi ashıldı. Fevral ayında Islam dúnyası mádeniy miyrası komitetiniń gezektegi májilisiniń juwmaqlarına bola, elimizdiń 7 materiallıq hám materiallıq emes miyras obekti ICESCO dizimine kirgizildi.

Sóylesiwde mádeniy estelikler hám qoljazbalardı restavraciyalaw, qorǵaw hám sanlastırıw, elimizdiń bay tariyxıy miyrasın xalıqaralıq media platformalar arqalı keńnen úgit-násiyatlaw, sonday-aq, birgeliktegi ilajlar ótkeriw máselelerine ayrıqsha itibar qaratıldı.

Ushırasıw juwmaǵında Ózbekstan Prezidenti xalqımızdıń bay mádeniy miyrasın keńnen en jaydırıwǵa qosqan jeke úlesi ushın Salim al-Malikti joqarı sıylıq – “Dwstlik” ordeni menen sıylıqladı.

ÓzA