Nókis qalasında jaylasqan «Aq qus» kompleksinde ótmish, búgin hám keleshek áwladlardı ózinde jámlegen Úsh áwladtıń óz-ara diydarlasıp, ushırasıw keshesi bolıp ótti.

Ushırasıwda uzaq jıllar dawamında xalıq xojalıǵınıń túrli tarawlarında jemisli miynet etken kekseler, veteranlar, búgingi kúndegi miynet aldınǵıları hám jaslar qatnastı.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, shıǵıp sóylep, elimizdiń rawajlanıwına múnásip úlesin qosıp atırǵan bir topar veteranlar hám túrli taraw wákilleriniń úlgili islerin ayrıqsha tilge aldı.

Ótkerilgen bul úsh áwlad ushırasıwında jası úlken áwlad wákilleri jaslar menen óz-ara pikir alısıp, jaslıq kúsh-ǵayratın qayta sezingendey boldı desek aljaspaǵan bolamız.

Al, jaslar bolsa ózinen aldınǵı áwlad wákilleriniń aqıl-násiyatlarınan úlken tásirler aldı.

Álbette, nuranıylardıń basıp ótken ómir jolı, erisken nátiyjeleri hám toplaǵan turmıslıq tájiriybesi búgingi jas áwlad ushın haqıyqıy turmıs mektebi bolıp, olardı joqarı tabıslarǵa ruwxlandıradı.

Ushırasıw dawamında elimiz rawajlanıwına salmaqlı úles qosqan bir qatar veteranlarǵa «Mehnat faxriysi» kókirek belgileri hám bahalı sawǵaları tapsırıldı.

Ilaj kórkem óner sheberleri atqarıwındaǵı koncert baǵdarlaması menen dawam etti.

Ótkerilgen ushırasıwǵa Ózbekstan Respublikası Prezidentiniń keńesgóyi Tursınxan Xudaybergenov, Ózbekstan Nuranıylar qorı basqarma baslıǵı Sodiqjon Turdiev, Qaraqalpaqstan Respublikası «Nuranıy» qorınıń baslıǵı Tursınbay Abdijabbarov qatnastı.

Qaraqalpaqstan xabar agentligi