Berdaq atındaǵı Qaraqalpaq mámleketlik universitetiniń baslaması menen Kegeyli rayonı Kámbaǵallıqtı qısqartıw hám bántlikke kómeklesiw bólimi hám Kegeyli rayonı Jaslar orayı menen birgelikte universitet pitkeriwshileriniń bántligin támiyinlewge qaratılǵan miynet yarmarkası shólkemlestirildi.

Ilajda Kegeyli rayonı Jaslar isleri bólimi baslıǵı D.Dúysenbaev, Kegeyli rayonı Kámbaǵallıqtı qısqartıw hám bántlikke kómeklesiw bólimi baslıǵı S.Seyitbekov hám Berdaq atındaǵı Qaraqalpaq mámleketlik universiteti Tariyx fakulteti dekanı S.Sulaymanovlar shıǵıp sóylep, pitkeriwshilerdi múnásip jumıs orınları menen támiyinlew, olardıń miynet bazarındaǵı básekige shıdamlılıǵın arttırıw hám jaslardıń bántligin támiyinlew baǵdarında ámelge asırılıp atırǵan jumıslar haqqında óz pikirlerin bildirdi.

Miynet yarmarkası dawamında pitkeriwshilerge rayonda bar bolǵan bos jumıs orınları, jumısqa ornalasıw tártipleri hám miynet qatnasıqlarına baylanıslı zárúrli maǵlıwmatlar berildi.

Yarmarka dawamında qatnasıwshılar jumıs beriwshiler menen tikkeley sóylesip, ózlerin qızıqtırǵan sorawlarına juwaplar aldı.

Ótkerilgen bul miynet yarmarkası universitet pitkeriwshileriniń bántligin támiyinlew, olardı turaqlı jumıs orınlarına baǵdarlaw hám jaslar arasında jumıssızlıqtı azaytıwǵa xızmet etedi.

Qaraqalpaqstan xabar agentligi