Ózbekstan Respublikası Prezidenti Shavkat Mirziyoev Islam civilizaciyası I Xalıqaralıq forumında qatnasıw ushın elimizge kelgen Kavkaz musılmanları mákemesiniń baslıǵı, Shayxulislom Ollohshukur Poshshozodanı qabılladı.

Ushırasıw aldınan mámleketimiz basshısı shayxulislam tárepinen sawǵa etilgen, Ózbekstan hám Ázerbayjan basshılarınıń ulıwma is-háreketlerine baǵıshlanǵan “Tuwısqanlıq hám awqamlaslıqtıń eń joqarı shıńı” kitabı ushın minnetdarshılıq bildirdi.

Sóylesiw dawamında milletleraralıq tatıwlıq hám diniy keńpeyillikti bunnan bılay da bekkemlew, jaslardıń ruwxıy tárbiyasın arttırıw hám basqa da máseleler hár tárepleme dodalandı.

Ózbekstan Prezidenti eki tárepleme mádeniy-aǵartıwshılıq birge islesiwdi jańa basqıshqa alıp shıǵıwǵa qaratılǵan áhmiyetli usınıslardı alǵa qoydı.

Islamnıń tiykarǵı adamgershilik mánisin jaslarǵa ápiwayı hám qızıqlı túrde túsindiriw ushın sanlı platformalar hám interaktiv bilimlendiriw qurallarınan paydalanıwda ilimiy potencialdı birlestiriw zárúr ekenligi atap ótildi.

Ushırasıw juwmaǵında mámleketimiz basshısı Ollohshukur Poshshozadaǵa musılman dúnyası ilimine qosıp atırǵan úlken úlesi ushın Ózbekstannıń “El-yurt hurmati” ordenin tapsırdı.

ÓzA