Ózbekstan Respublikası Prezidenti Shavkat Mirziyoev Belarus Respublikası Prezidenti Aleksandr Lukashenkonıń mirát etiwine bola 8-9-iyul kúnleri rásmiy sapar menen usı elde boldı.

9-iyul kúni Minsk qalasındaǵı Ǵárezsizlik sarayında Ózbekstan Respublikası Prezidenti Shavkat Mirziyoevti saltanatlı kútip alıw máresimi bolıp ótti.
Saray aldındaǵı maydanda eki mámlekettiń bayraqları kóterildi hám húrmetli qarawıl sap tarttı.

Mámleketimiz basshısın Belarus Respublikası Prezidenti Aleksandr Lukashenko qızǵın kútip aldı.

Mámleketlik gimnler jańladı.

Jetekshiler húrmetli qarawıl qatarı aldınan ótip, rásmiy delegaciyalar aǵzaların qutlıqladı.

Bunnan soń Ózbekstan Respublikası Prezidenti Shavkat Mirziyoev hám Belarus Respublikası Prezidenti Aleksandr Lukashenko tar sheńberde hám rásmiy delegaciyalar aǵzalarınıń qatnasıwında sóylesiwler ótkerdi.

Ushırasıw aldında mámleketimiz basshısı sońǵı jıllarda Ózbekstan menen Belarus arasındaǵı kóp qırlı qatnasıqlar sapa jaǵınan jańa basqıshqa kóterilgenin ayrıqsha atap ótti.

Bul sapar etiwge tayarlıq sheńberinde Húkimetleraralıq komissiya hám Isbilermenler keńesiniń májilisleri, siyasiy másláhátlesiwler, analitikalıq toparlardıń ushırasıwları, Ózbekstan mádeniyatı kúnleri hám basqa da ilajlar tabıslı ótkerildi.

Óz-ara sawda kólemi turaqlı pátte ósip atırǵanı qanaatlanıwshılıq penen atap ótildi. Sońǵı bes jılda bul kórsetkish derlik 3 esege artıp, ótken jıldıń juwmaǵına bola derlik 1 milliard dollarǵa jetti. Usı jıldıń ótken dáwirinde onıń kólemi jáne 30 procentke arttı. 360 qospa kárxana tabıslı jumıs alıp barmaqta.

Jetekshiler kúni keshe óz-ara sawda kólemin 2 milliard dollarǵa jetkeriw boyınsha anıq háreketler kelisip alınǵanın hám awıl xojalıǵı, mashina qurılısı, farmacevtika, elektrotexnika, jeńil sanaat, mebel qurılısı hám sanaattıń basqa da tarmaqlarında jańa kooperaciyalıq joybarlardan ibarat ilajlar rejesiniń qabıl etilgenin qollap-quwatladı.

Ózbekstan tınısh atomnan paydalanıw hám bul tarawda infrastrukturanı qurıw baǵdarında tájiriybe almasıwdan mápdar ekeni bildirildi.

Jedel mádeniy-gumanitarlıq almasıwdı izbe-iz dawam ettiriw áhmiyetli ekenligi atap ótildi.

Májilis dawamında birgeliktegi Húkimetleraralıq komissiya járdemshi baslıqlarınıń esabatları hám sóylesiwler kún tártibi boyınsha anıq usınısları da tıńlandı.
Juwmaǵında Prezident Shavkat Mirziyoev kásiplesi Aleksandr Lukashenkonı rásmiy sapar menen Ózbekstanǵa keliwge mirát etti.

Bolıp ótken sóylesiwlerdiń juwmaǵında Ózbekstan Respublikası Prezidenti Shavkat Mirziyoev hám Belarus Respublikası Prezidenti Aleksandr Lukashenko Strategiyalıq sheriklik qatnasıqların ornatıw haqqındaǵı deklaraciyaǵa qol qoydı.

Sonday-aq, mámleket basshıları janında bir qatar eki tárepleme hújjetler almasıldı. Sonnan:

– 2026-2030-jıllarda sawda-ekonomikalıq hám sociallıq-gumanitarlıq birge islesiwdi rawajlandırıw boyınsha ilajlar rejesi;

– Ózbekstan Respublikası Sırtqı isler ministrligi hám Belarus Respublikası Sırtqı isler ministrligi arasında 2026-2027-jıllarǵa mólsherlengen másláhátlesiwler baǵdarlaması;

– 2005-jıl 19-yanvardaǵı “Puqaralardıń óz-ara qatnawları haqqında”ǵı kelisimge ózgeris hám qosımshalar kirgiziw haqqında protokol;

– Belarus Respublikası aymaǵında waqtınsha miynet etiw ushın Ózbekstan Respublikası puqaraların shólkemleskenlik tiykarında qabıl etiw hám tartıw haqqında kelisim;

– Toǵay xojalıǵın rawajlandırıw tarawındaǵı birge islesiw haqqında kelisim;

– 2026-2028-jıllarǵa mólsherlengen mádeniyat tarawındaǵı birge islesiw baǵdarlaması;

– Ózbekstan Respublikası Ayrıqsha jaǵdaylar ministrligi hám Belarus Respublikası Ayrıqsha jaǵdaylar ministrligi arasında 2027-2028-jıllarǵa mólsherlengen birge islesiw boyınsha ilajlar rejesi;

– Óz-ara turistler aǵımın kóbeytiw hám turizm tarawındaǵı birge islesiwdi rawajlandırıw boyınsha 2026-2027-jıllarǵa mólsherlengen birgeliktegi háreketler rejesi;
– 2026-2028-jıllarda agrosanaat kompleksindegi birge islesiwdi jáne de tereńlestiriw boyınsha “jol kartası”;

– Ózbekstan Respublikası Ministrler Kabineti janındaǵı Jeńil sanaattı rawajlandırıw agentligi hám Belarustıń “Bellegprom” mámleketlik koncerni arasında jeńil sanaat tarawındaǵı birge islesiw haqqında protokol;

– Ózbekstan Respublikası Prezidenti janındaǵı Sociallıq qorǵaw milliy agentligi hám Belarus Respublikası Miynet hám sociallıq qorǵaw ministrligi arasında xalıqtı sociallıq qorǵaw tarawındaǵı birge islesiw boyınsha óz-ara túsinisiw memorandumı;

– Ózbekstan Respublikası Ekonomika hám qarjı ministrligi hám Belarus Respublikası Qarjı ministrligi arasında qarjı máseleleri boyınsha óz-ara túsinisiw memorandumı;

– Ózbekstan Respublikası Prezidenti janındaǵı Strategiyalıq hám regionlararalıq izertlewler institutı hám Belarus strategiyalıq izertlewler institutı arasında Ózbekstan – Belarus ekspertler keńesin shólkemlestiriw haqqında memorandum;

– Ózbekstan Respublikası Awıl xojalıǵı ministrligi hám Belarus Respublikası Awıl xojalıǵı hám azıq-awqat ministrligi arasında agrosanaat tarawında investiciyalıq birge islesiwdi rawajlandırıw boyınsha kelisim memorandumı;

– Ózbekstan Respublikası Ilimler akademiyası hám Belarus Milliy ilimler akademiyası arasında ilimiy-texnikalıq birge islesiw boyınsha óz-ara túsinisiw memorandumı.

Sonday-aq, sapar sheńberinde Ózbekstan Respublikası Joqarı bilimlendiriw, ilim hám innovaciyalar ministrligi hám Belarus Respublikası Fundamental izertlewler qorı arasında da memorandumǵa qol qoyıldı.

Ózbekstan Respublikası Prezidenti Shavkat Mirziyoev hám Belarus Respublikası Prezidenti Aleksandr Lukashenko sóylesiwlerdiń juwmaqları haqqında ǵalaba xabar qurallarınıń wákilleri ushın bayanat berdi.

Mámleketimiz basshısı Aleksandr Lukashenkoǵa shın júrekten qabıllaǵanı hám jıllı miymandoslıq ushın minnetdarshılıq bildirip, Belarus xalqın jaqında belgilengen Ǵárezsizlik kúni menen qutlıqladı.

Bul rásmiy sapar Ózbekstan – Belarus qatnasıqlarınıń rawajlanıwında tariyxıy waqıya ekeni qanaatlanıwshılıq penen atap ótildi.

Sonıń ishinde, Strategiyalıq sheriklik qatnasıqların ornatıw haqqındaǵı deklaraciyaǵa qol qoyılǵanı sammittiń tiykarǵı nátiyjelerinen biri boldı.

Ózbekstan jetekshisiniń atap ótkenindey, bul hújjet mámleketleraralıq birge islesiwdi bekkemlewde jańa bet ashıp, táreplerdiń kóp tárepleme sheriklikti uzaq múddetli rawajlandırıw baǵdarındaǵı isenimli umtılısın tastıyıqlaydı.

Sóylesiwlerge úlken tayarlıq kórilgeni olardıń tabıslı ótiwinde áhmiyetli faktor bolǵanı atap ótildi.

Sapar aldınan Húkimetleraralıq komissiya hám Isbilermenler keńesiniń májilisleri, siyasiy másláhátlesiwler, úshinshi Aymaqlararalıq forum, Ózbekstan mádeniyatı kúnleri hám tallaw toparlarınıń ushırasıwı bolıp ótti.

Mámleket basshıları siyasiy sóylesiwdi bunnan bılay da rawajlandırıw hám parlamentleraralıq birge islesiwdi bekkemlew zárúr ekenligin atap ótti.

Sammit aldınan tovar almasıwdıń kólemin 2 milliard dollarǵa jetkeriw boyınsha anıq ilajlardı jáne tiykarǵı tarawlardaǵı jańa joybarlaw baslamaların qamtıp alǵan kompleksli reje qabıl etildi.

Onda awıl xojalıǵı, mashina qurılısı, farmacevtika, elektrotexnika, mikroelektronika, toqımashılıq, mebel qurılısı hám basqa da tarmaqlarda kooperaciyanı rawajlandırıw názerde tutılǵan.

Ózbekstanda birinshi atom elektr stanciyası hám túrles infrastrukturanı qurıwda Belarus tájiriybesin qollanıw boyınsha kelisimge erisildi.

Úshinshi Ózbekstan – Belarus Aymaqlararalıq forumınıń juwmaqları joqarı bahalandı. Forum jumısında Ózbekstannıń 230 ǵa shamalas isbilermenleri qatnastı.
Birlesken Milletler Shólkemi, ǴMDA, ShBSh hám Qosılmaw háreketi sıyaqlı regionallıq hám xalıqaralıq strukturalar sheńberindegi birge islesiwdi bunnan bılay da tereńlestiriwge umtılıw isenimli ekeni atap ótildi.

Mádeniyat hám kórkem óner, bilimlendiriw, densawlıqtı saqlaw hám turizm tarawlarındaǵı jedel almasıwlar dawam ettiriledi.

Mámleketimiz basshısı Minsk qalasında Ózbekstan – Belarus doslıq qıyabanın qurıw baslaması ushın minnetdarshılıq bildirdi.

Usı jılı gezektegi medicina, bilimlendiriw hám turizm forumların shólkemlestiriwge kelisip alındı.

Juwmaǵında búgingi tariyxıy sapar etiw nátiyjeleri strategiyalıq sheriklik qatnasıqların jáne de bekkemlewge jáne eki eldiń turaqlı rawajlanıwına hám abadanlıǵına hár tárepleme xızmet etetuǵını atap ótildi.

Sonıń menen Ózbekstan Respublikası Prezidenti Shavkat Mirziyoevtiń Belarusqa rásmiy saparı juwmaqlandı. Paytaxt aeroportında joqarı mártebeli miymandı Belarus Respublikası Prezidenti Aleksandr Lukashenko shıǵarıp saldı.

ÓzA