Ózbekstan Respublikası Prezidenti Shavkat Mirziyoev hám Belarus Respublikası Prezidenti Aleksandr Lukashenko tar sheńberde hám rásmiy delegaciyalar aǵzalarınıń qatnasıwında sóylesiwler ótkerdi.

Ushırasıw aldınan mámleketimiz basshısı sońǵı jıllarda Ózbekstan menen Belarus arasındaǵı kóp tárepleme qatnasıqlar sapa jaǵınan jańa basqıshqa kóterilgenin ayrıqsha atap ótti.

Bul saparǵa tayarlıq sheńberinde Húkimetleraralıq komissiya hám Isbilermenler keńesiniń májilisleri, siyasiy másláhátlesiwler, analitikalıq toparlardıń ushırasıwları, Ózbekstan mádeniyatı kúnleri hám basqa da ilajlar tabıslı ótkerildi.

Óz-ara sawda kólemi turaqlı pátte ósip atırǵanı qanaatlanıwshılıq penen atap ótildi. Sońǵı bes jılda bul kórsetkish derlik 3 esege artıp, ótken jıldıń juwmaǵına bola derlik 1 milliard dollarǵa jetti. Usı jıldıń ótken dáwirinde onıń kólemi jáne 30 procentke arttı. 360 qospa kárxana tabıslı jumıs alıp barmaqta.

Jetekshiler kúni keshe óz-ara sawda kólemin 2 milliard dollarǵa jetkeriw boyınsha anıq háreketler kelisip alınǵanın hám awıl xojalıǵı, mashina qurılısı, farmacevtika, elektrotexnika, jeńil sanaat, mebel qurılısı hám sanaattıń basqa da tarmaqlarında jańa kooperaciyalıq joybarlardan ibarat ilajlar rejesiniń qabıl etilgenin qollap-quwatladı.

Ózbekstan tınısh atomnan paydalanıw hám bul tarawda infrastrukturanı qurıw baǵdarında tájiriybe almasıwdan mápdar ekeni bildirildi.

Keshe Minsk qalasında bolıp ótken úshinshi Ózbekstan-Belarus aymaqlararalıq forumınıń paydalı nátiyjeleri ayrıqsha atap ótildi. Onıń juwmaǵında sawda shártnamaları hám investiciyalıq kelisimlerdiń salmaqlı toplamına qol qoyıldı.

Tárepler xalıqaralıq strukturalar, sonıń ishinde Birlesken Milletler Shólkemi, ǴMDA, ShBSh hám Qosılmaw háreketi sheńberinde óz-ara qollap-quwatlawdı dawam ettiriwge isenimli umtılısların tastıyıqladı.

Jedel mádeniy-gumanitarlıq almasıwdı izbe-iz dawam ettiriw áhmiyetli ekenligi atap ótildi.

Mámleketimiz basshısı Minsk qalasında Ózbekstan – Belarus doslıq qıyabanın qurıw baslaması ushın Aleksandr Lukashenkoǵa minnetdarshılıq bildirdi.

Usı jıldıń aqırına shekem birgeliktegi turizm, medicina hám bilimlendiriw forumların shólkemlestiriwge kelisip alındı.

Májilis dawamında qospa Húkimetleraralıq komissiya járdemshi baslıqlarınıń esabatları hám sóylesiwler kún tártibi boyınsha anıq usınısları da tıńlandı.

Soń Prezident Shavkat Mirziyoev kásiplesi Aleksandr Lukashenkonı rásmiy sapar menen Ózbekstanǵa keliwge mirát etti.