Tashkent qalasında Ózbekstan Respublikası Oliy Majlisi Senatınıń on jetinshi jalpı májilisi óz jumısın basladı.

Oǵan Senat hám Húkimet aǵzaları, ministrlikler hám uyımlardıń basshıları, ǵalaba xabar qurallarınıń wákilleri qatnaspaqta.

Senat Baslıǵı Tanzila Norboeva basqarıp atırǵan májilis kún tártibine mámlekettiń sociallıq-ekonomikalıq rawajlanıwı, mámleketlik basqarıw, qurılıs, texnikalıq jaqtan tártipke salıw, órt qáwipsizligi, farmacevtika, sociallıq qorǵaw, sanlı texnologiyalar, xalıqaralıq birge islesiw hám nızamshılıqtı jetilistiriwge qaratılǵan bir qatar áhmiyetli máseleler kirgizildi.

“Tashkent xalıqaralıq finans orayı haqqında”ǵı hám “Sanlı texnologiyalar xalıqaralıq orayı haqqında”ǵı Ózbekstan Respublikasınıń konstituciyalıq nızamları, “Sociallıq jumıs haqqında”ǵı nızam usılardıń qatarına kiredi.

Jalpı májiliste balalardı sociallıq qorǵaw, kúsh kórsetiw hám zorlıqtan jábirlengen shaxslarǵa sociallıq xızmetler kórsetiw sistemasın jetilistiriw, texnikalıq jaqtan tártipke salıw, qurılıs tarawında mámleketlik qadaǵalaw, órt qáwipsizligi, mámleketlik puqaralıq xızmeti, farmacevtika tarawı hám basqa da bir qatar baǵdarlarǵa baylanıslı nızamlar da dodalanadı.

Ózbekstan Respublikasınıń tiykarǵı xalıqaralıq reyting hám indekslerdegi ornın jaqsılaw haqqındaǵı milliy bayanat tıńlanadı.

Bunnan tısqarı, basqarıw servis kompaniyaları hám turaq jay múlk iyeleri shirketleri tárepinen kórsetilip atırǵan xızmetlerdiń sapası boyınsha Ministrler Kabinetine jiberilgen parlamentlik soraw nátiyjeleri kórip shıǵıladı.

N.Abduraimova,
N.Haydarov (foto), ÓzA