Qaraqalpaqstan Respublikası Transport ministrligi málimleme xızmetiniń málim etiwinshe, Nókis qalasında xalıqqa kórsetilip atırǵan transport xızmetleriniń sapasın arttırıw, jolawshılarǵa qosımsha qolaylıqlar jaratıw, qalalıq jámiyetlik transport sistemasın jetilistiriw boyınsha zárúr ilajlar kórilmekte.

Respublikada jolawshı tasıw jumısı menen shuǵıllanıwshı isbilermenlik subektleri tárepinen háreketleniw quramın jańalaǵan halda jolawshılarǵa qolaylı hám qáwipsiz xızmet kórsetiwdi shólkemlestiriw máselesine ayrıqsha itibar qaratılmaqta.

Qalada jolawshı tasıw jumısı menen shuǵıllanıwshı “Fayz avangard” JShJ tárepinen Qıtay Xalıq Respublikasınan qalalıq jámiyetlik transport infrastrukturasın jetilistiriw maqsetinde 32 dana avtobus alıp kelinbekte.

Jaqında Nókis qalasına usı avtobuslardıń dáslepki 12 si alıp kelindi. Qalǵan 20 sı kelesi háptede qalaǵa jetip keledi. Jańadan alıp kelingen avtobuslar qala ishindegi 2 jónelis boyınsha jolawshılarǵa xızmet kórsetiwi rejelestirilgen.

– 70 jolawshını qolaylı sharayatlarda mánzillerine jetkeriwge mólsherlengen bul avtobuslar tómen pollı bolıp, mayıplıǵı bolǵan shaxslar háreketleniwi ushın arnawlı pandus úskeneleri hám óz aldına orınlıqlar menen úskenelengen, – deydi Qaraqalpaqstan Respublikası Transport ministrligi málimleme xızmetiniń baslıǵı Zaxida Qaljanova. – Jol haqı tólemlerin elektron tárizde de ámelge asırıw ushın ATTO sisteması ornatılǵan.

Maǵlıwmat ushın, ótken jılı brutto-shártnama sisteması tiykarında qala ishinde eki jóneliske jańa 24 avtobus jaylastırılǵan edi. Házirgi kúnde olar xalıqqa sapalı xızmet kórsetip kelmekte. Bul sistema tiykarında negizinde qala boylap 20 jónelis shólkemlestirilgen. Házirgi kúnde sonnan ekewi – 24A hám 7A jónelislerine avtobuslar jaylastırıldı.

Endi 2026-jıldıń aqırına shekem jáne 100 den aslam avtobuslar alıp keliniwi rejelestirilgen. Nókis qalası ishindegi barlıq jónelisler boyınsha avtobuslar qatnawı jolǵa qoyıladı.

Qaraqalpaqstan xabar agentligi