Bıyıl respublikamızda, jámi 70,7 kilometrlik gaz tarmaqlarında qurılıs-rekonstrukciyalaw jumısların alıp barıw rejelestirilgen. Sonnan, 2026-2027-jılǵı gúzgi-qısqı máwsimdi artıqsha zıyansız ótkeriw maqsetinde aymaqlarda belgilep alınǵan jumıslar da qızǵın dawam etpekte.

Házirgi waqıtta «Hududgaz Qaraqalpaqstan» gaz támiynatı filialına qaraslı qurılıs-montajlaw basqaraması tárepinen Shımbay rayonındaǵı Temir jol gúzarı mákan puqaralar jıyını aymaǵında alıp barılıp atırǵan rekonstrukciyalaw jumısları da solardıń qatarına kiredi.

Qurılıs-montajlaw basqarması tárepinen bul jerde usı máhálledegi tutınıwshılardı tábiyiy gaz benen támiyinlewshi uzınlıǵı 1,2 kilometrlik, d-159 mm. bolǵan orta basımlı jer astı gaz tarmaqları jer ústine shıǵarılıp, qurılıs jumısları alıp barılmaqta.

Bul jumıslardan gózlengen tiykarǵı maqset – gaz bólistiriw stanciyalarınan qabıllap alınǵan tábiyiy gazdi artıqsha joǵaltıwlarsız tutınıwshılarǵa jetkerip beriw bolıp esaplanadı. Sonday-aq, olardıń tábiyiy gazden qáwipsiz paydalanıwın támiyinlewden ibarat.

Rekonstrukciyalaw jumısları tez arada tolıq juwmaqlansa, aymaqtaǵı 850 den aslam xojalıqtıń tábiyiy gaz benen támiyinleniwi jaqsılanadı.

Á.Jiyemuratov,
Qaraqalpaqstan xabar agentligi.