Berdaq atındaǵı Qaraqalpaq mámleketlik universiteti tárepinen 2026/2027-oqıw jılı ushın kásiplik (dóretiwshilik) imtixanlardı ótkeriw boyınsha usı jıldıń 7-16 iyul kúnleri aralıǵında arnawlı keste tastıyıqlanıp, usı kestege muwapıq, búgin 7-iyul kúni Dene mádeniyatı tálim baǵdarı boyınsha kásiplik (dóretiwshilik) imtixanlar baslandı.

Imtixanlar Nókis qalasındaǵı 1-sanlı sport mektebinde, azanǵı saat 06:00 den baslap shólkemlestirildi. Bul imtixanlarda abiturientlerdiń fizikalıq tayarlıǵı, sport kónlikpeleri hám tańlanǵan baǵdar boyınsha uqıbı arnawlı normalar tiykarında sınaqtan ótkerilmekte.

Kásiplik (dóretiwshilik) imtixanlar ótkeriletuǵın orınlarda abiturientler hám olardıń ata-anaları ushın barlıq qolaylıqlar jaratılǵan. Sport mektebi aymaǵında kútiw zonaları, ishimlik suwı, medicinalıq xızmet shólkemlestirilip, zárúr maǵlıwmatlar menen támiyinlengen. Imtixanlardıń ashıq-aydınlıǵın hám ádil ótiwin támiyinlew maqsetinde imtixan ótkeriletuǵın barlıq orınlar zamanagóy baqlaw kameraları menen úskenelengen.

Sonıń menen birge, kásiplik (dóretiwshilik) imtixanlardı internet arqalı onlayn rejimde tikkeley baqlaw imkaniyatı da jolǵa qoyıldı. Bul bolsa ata-analar hám keń jámiyetshilikke imtixanlar procesin tikkeley kóriw, olardıń ashıq-aydın hám ádil ótiwine isenim payda etiw imkaniyatın bermekte.

Universitette kásiplik (dóretiwshilik) imtixanlardı joqarı dárejede, ashıq-aydın túrde ótkeriwge úlken itibar qaratılmaqta. Hár bir abiturientke teńdey imkaniyatlar jaratılǵan bolıp, olar óz bilim hám qábiletlerin biymálel kórsetiwi múmkin.

Qaraqalpaqstan xabar agentligi