Berdaq atındaǵı Qaraqalpaq mámleketlik universitetinde “KJC” Qaraqalpaqstan Yaponiya xalıq bilimlendiriw orayı menen birgelikte shólkemlestirilgen yapon tili hám kásip-ónerge oqıtıw orayı óz jumısın tabıslı dawam ettirmekte.

Universitette Yaponiyanıń abıraylı “Koutaru Kai – Joho Bencha” kompaniyasınıń direktorı Kai Koutaro hám kompaniya qánigeleriniń qatnasıwında ushırasıw bolıp ótti. Miymanlardı universitet rektorı Berdiyar Jollıbekov qabıl etip, eki tárepleme birge islesiw perspektivaları boyınsha pikir alısıldı.

Bunnan soń, tárepler usı jıldıń avgust ayınıń dáslepki on kúnliginde Berdaq atındaǵı Qaraqalpaq mámleketlik universitetinde “”KJC” mádeniyat festivalın ótkeriw boyınsha sóylesiwler alıp bardı. Bul festival sheńberinde yapon mádeniyatı, úrp-ádetleri, bilimlendiriw sisteması hám zamanagóy texnologiyaları menen jaqınnan tanıstıratuǵın túrli mádeniy-aǵartıwshılıq ilajlardı shólkemlestiriw rejelestirilgen.

Bul birge islesiw universitettiń xalıqaralıq baylanısların bekkemlew, studentlerge jańa bilimlendiriw hám kásiplik imkaniyatlar jaratıw jáne Ózbekstan hám Yaponiya arasındaǵı doslıq qatnasıqların jáne de rawajlandırıwǵa xızmet etedi.

Qaraqalpaqstan xabar agentligi