Iordaniya menen óz-ara paydalı birge islesiwdi bunnan bılay da rawajlandırıw áhmiyetli ekeni atap ótildi
64
Ózbekstan Respublikası Prezidenti Shavkat Mirziyoev 6-iyul kúni Iordaniya Hoshimiyler Patshalıǵı Bas ministriniń orınbasarı, sırtqı isler hám emigrantlar máseleleri boyınsha ministri Ayman Xuseyn Safadiy basshılıǵındaǵı delegaciyanı qabılladı.
Sóylesiw aldında joqarı mártebeli miyman mámleketimiz basshısına Iordaniya Patshası Abdulla II ibn al-Xuseynniń qızǵın sálemin hám tileklerin jetkerdi.
Ushırasıwda Ózbekstan menen Iordaniya arasındaǵı kóp táreplemeli birge islesiwdi keńeytiwdiń áhmiyetli máseleleri dodalandı.
Ótken jılı Samarqandta bolıp ótken joqarı dárejedegi nátiyjeli sóylesiwler eki tárepleme qatnasıqlar tariyxında jańa bet ashqanı qanaatlanıwshılıq penen atap ótildi.
Erisilgen kelisimler sheńberinde usı jılı parlamentleraralıq doslıq toparları dúzildi, Húkimetleraralıq qospa komissiyanıń birinshi májilisi ótkerilip, Isbilermenler keńesi shólkemlestirildi, sonday-aq, hawa qatnawları jolǵa qoyıldı.
Keleshekte siyasiy sóylesiwlerdi jedellestiriw, sawda-ekonomikalıq, investiciyalıq hám mádeniy-gumanitarlıq tarawlarda qospa joybarlar menen baǵdarlamalardı alǵa qoyıwǵa ayrıqsha itibar qaratıldı.
Sonday-aq, áhmiyetli xalıqaralıq hám regionallıq máseleler boyınsha pikir alısıldı.
ÓzA