Prezident Shavkat Mirziyoev neft-gaz tarmaǵında gezektegi gúzgi-qısqı máwsimge tayarlıq jumıslarınıń barısı boyınsha málimleme menen tanıstı.

2026-2027-jıllar gúzgi-qısqı máwsimde xalıq, sociallıq taraw obektleri hám ekonomika tarmaqların energiya resursları menen turaqlı támiyinlew maqsetinde islep shıǵılǵan kompleksli ilajlar kórip shıǵıldı. Tábiyiy hám suyıltılǵan gaz jetkerip beriw, magistral hám aymaqlıq gaz tarmaqların ońlaw, janılǵı rezervlerin qáliplestiriw hám avariyalıq-tiklew brigadalarınıń tayarlıǵın támiyinlew boyınsha anıq wazıypalar qoyıldı.

Tábiyiy gaz támiynatı sistemasın máwsimge tayarlaw jumıslarına ayrıqsha itibar qaratıldı. Sonıń ishinde, máwsimge shekem magistral gaz qubırlarınıń 53,7 kilometr nasaz bólegin almastırıw, kompressor stanciyalarındaǵı 77 gaz aydaw agregatın tolıq ońlaw rejelestirilgen.

Sonday-aq, 881 máhálledegi 220 mıń shańaraqtıń gaz támiynatın jaqsılaw hám texnologiyalıq joǵaltıwlardı qısqartıw maqsetinde úsh basqıshlı bólistiriw sistemasınan eki basqıshlı sistemaǵa ótkeriw názerde tutılǵan. 711,9 kilometr gaz tarmaǵı hám 400 gaz bólistiriw punkti tolıq ońlanadı hám rekonstrukciyalanadı.

Xalıq hám sociallıq taraw obektlerin suyıltılǵan gaz benen támiyinlew máselesi de kórip shıǵıldı. Gúzgi-qısqı máwsimde 325,7 mıń tonna suyıltırılǵan gaz jetkerip beriw, sonıń ishinde, barıw qıyın bolǵan 229 awıldaǵı 104,7 mıń tutınıwshıǵa 8,2 mıń tonna suyıltılǵan gaz jetkerip beriw belgilengen.

Qısqı dáwir ushın janılǵı rezervlerin qáliplestiriw boyınsha da ilajlar kórilmekte. Sonıń ishinde, dekabr-yanvar ayları ushın 120 mıń tonna avtobenzin rezervin jaratıw rejelestirilgen. Íssılıq elektr stanciyalarına máwsim dawamında 4 million 161 mıń tonna kómir jetkerip beriw prognoz etilmekte.

“Ózbekneftgaz” sistemasındaǵı kárxanalarda texnologiyalıq turaqlılıqtı támiyinlew maqsetinde 90 texnologiyalıq qurılmada ońlaw jumısları ámelge asırıladı. Bul óndirislik quwatlıqlardıń úzliksiz islewi, xalıq hám ekonomika tarmaqlarına energiya resursların turaqlı jetkerip beriwge xızmet etedi.

Tayarlıq jumısları tek ǵana neft-gaz sisteması menen sheklenip qalmastan, ulıwma energetika hám kommunallıq tarawlar menen tıǵız baylanıslı halda alıp barıw zárúr ekenligi kórsetip ótildi. Usı maqsette respublikalıq hám aymaqlıq komissiyalardıń jumısın jolǵa qoyıp, máwsimge tayarlıq jumısların muwapıqlastırıw hám turaqlı qadaǵalap barıw tapsırıldı.

Juwapkerlerge belgilengen ilajlardıń orınlanıwın qatań qadaǵalaw, máwsimge tayarlıq jumısların óz múddetinde hám sapalı juwmaqlaw, xalıq hám sociallıq taraw obektlerine tábiyiy hám suyıltılǵan gaz, sonday-aq, basqa da janılǵı resursların turaqlı jetkerip beriw boyınsha tiyisli tapsırmalar berildi.

ÓzA