Nókis rayonı hákimligi hám Qıtay Xalıq Respublikası Sinczyan-Uyǵır avtonom wálayatınıń Aqsu rayonı arasında sawda-ekonomikalıq, bilimlendiriw, awıl xojalıǵı, densawlıqtı saqlaw, energetika, mádeniyat hám sport tarawlarında óz-ara birge islesiwdi bekkemlewge qaratılǵan doslıq kelisimine qol qoyılǵan edi.

Bul kelisim sheńberinde eki aymaq arasındaǵı birge islesiwdi ámeliy jaqtan jáne de keńeytiw, ásirese, bilimlendiriw tarawında aldınǵı tájiriybelerdi úyreniw hám óz-ara almasıw maqsetinde gezektegi áhmiyetli baslama ámelge asırıldı.

Atap aytqanda, Nókis rayonı aymaǵındaǵı bilimlendiriw mákemelerinde jumıs alıp barıp atırǵan 4 pedagog xızmetker Qıtay Xalıq Respublikasınıń Sinczyan-Uyǵur avtonom wálayatınıń Aqsu rayonındaǵı bilimlendiriw mákemelerine grant tiykarında xızmet saparına jiberildi.

Baǵdarlama dawamında pedagoglar zamanagóy bilimlendiriw processleri menen jaqınnan tanısıw, oqıw sabaqlarında qollanılıp atırǵan innovaciyalıq pedagogikalıq texnologiyalar, nátiyjeli sabaq ótiw metodikaları, bilimlendiriw mákemelerin basqarıw sisteması hám oqıwshılardıń bilimin bahalawdıń zamanagóy usılların úyreniw imkaniyatına iye boladı.

Sonday-aq, xızmet saparı dawamında eki tárep bilimlendiriw mákemeleri arasında óz-ara birge islesiw baylanısların bekkemlew, tájiriybe almasıw hám keleshekte qospa joybarlardı ámelge asırıw boyınsha pikir alısıw rejelestirilgen.

Bul tájiriybe almasıwdıń tiykarǵı maqseti Qıtay bilimlendiriw sistemasında keńnen qollanılıp atırǵan aldınǵı pedagogikalıq texnologiyalar, innovaciyalıq kózqaraslar hám nátiyjeli oqıtıw metodikaların úyreniw hám olardı Nókis rayonı bilimlendiriw mákemeleriniń jumısına basqıshpa-basqısh engiziw arqalı bilimlendiriwdiń sapasın hám nátiyjeliligin jáne de arttırıwdan ibarat.

Qaraqalpaqstan xabar agentligi