Ilajǵa pitkeriwshiler, olardıń ata-anaları, professor-oqıtıwshılar, pedagog xızmetkerler, sonday-aq, keń jámiyetshilik hám ǵalaba xabar qurallarınıń wákilleri qatnastı.

Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Ózbekstan Veteranlarınıń sociallıq jumısların qollap-quwatlaw “Nuranıy” qorı Qaraqalpaqstan Respublikası bólimi baslıǵı T.Abdijabbarov, Ózbekstan mámleketlik kórkem óner hám mádeniyat institutı rektorınıń Jaslar máseleleri hám ruwxıy-aǵartıwshılıq isleri boyınsha prorektorı Sh.Ergashev hám filial direktorı K.Yusupovlar barlıq pitkeriwshi jaslardı qızǵın qutlıqlap, aldaǵı jumıslarına bálent párwazlar tiledi hám pitkeriwshilerge saltanatlı túrde diplomlar tapsırıldı. Sonday-aq, belsendi pitkeriwshilerdiń ata-anaları hám ustazları Húrmet jarlıqları hám minnetdarshılıq xatları menen sıylıqlandı.

Ilajda atap ótilgenindey, Ózbekstan mámleketlik kórkem óner hám mádeniyat institutı Nókis filialı 2025-2026-oqıw jılında kúndizgi, sırtqı hám magistratura qánigelikleri boyınsha jámi 362 jaslarımız tabıslı pitkerip shıqtı.

– Perzentiniń joqarı maǵlıwmatlı bolıp, jámiyette óz ornına iye bolıwı hár bir ata-ananıń eń úlken arzıwlarınıń biri bolıp tabıladı, – deydi pitkeriwshilerdiń ata-analarınıń biri O.Baltabaev. – Mine búgin pitkeriwshi jaslarımız jıllar dawamında alǵan bilimleri nátiyjesinde mámleketlik attestaciya sınaqları hám pitkeriw qánigelik diplomların tabıslı qorǵap, qánigelik diplomların alıwǵa miyasar bolmaqta. Bul ata-ananı, qalaberse bilim bergen ustazların úlken quwanıshqa bóleydi.

Ótkerilgen saltanatlı ilaj student-jaslar tárepinen tayarlanǵan koncert baǵdarlaması menen dawam etti.

Ilajǵa Qaraqalpaqstan Respublikası Mádeniyat ministri B.Temirbaev hám Qaraqalpaqstan Respublikası Mektepke shekemgi hám mektep bilimlendiriwi ministri A.Ayapovlar da qatnastı.

Qaraqalpaqstan xabar agentligi