Ózbekstan Respublikası Prezidenti Shavkat Mirziyoev Gruziya Bas ministri Irakliy Kobaxidzenıń mirát etiwine bola 2-3-iyul kúnleri mámleketlik sapar menen usı elde boldı.

Mámleketimiz basshısı 3-iyul kúni Tbilisi qalasındaǵı Qaharmanlar maydanına bardı.

Ózbekstan Respublikası Prezidenti húrmetine húrmetli qarawıl sap tarttı.

Elimiz jetekshisi Gruziya birligi ushın qaytıs bolǵan qaharmanlar esteligine gúl qoydı. Áskeriy orkestrdiń atqarıwında Ózbekstan hám Gruziya mámleketlik gimnleri jańladı.

Bunnan soń Ózbekstan Respublikası Prezidenti Shavkat Mirziyoev hám Gruziya Bas ministri Irakliy Kobaxidze tar sheńberde hám eki mámleket rásmiy delegaciyalarınıń qatnasıwında sóylesiw ótkerdi.

Mámleketimiz basshısı ushırasıw aldınan Ózbekstan Prezidentiniń Gruziyaǵa jigirma jıldan aslam dáwirde birinshi márte ámelge asırılıp atırǵan bul mámleketlik saparı Ózbekstan – Gruziya qatnasıqların sapa jaǵınan jańa basqıshqa alıp shıǵıwda ayrıqsha áhmiyetke iye ekenin atap ótti.

Siyasiy, sawda-ekonomikalıq, investiciyalıq, transport-tranzit, turizm hám mádeniy-gumanitarlıq tarawlardaǵı ámeliy birge islesiwdi keńeytiw máseleleri kórip shıǵıldı.

Barlıq dárejelerdegi sóylesiwler izbe-iz rawajlanıp atırǵanı qanaatlanıwshılıq penen atap ótildi. Tárepler húkimetler, parlamentler, isbilermen toparlar arasındaǵı jedel baylanıslardı jáne mádeniy-gumanitarlıq almasıwlardı dawam ettiriw áhmiyetli ekenin atap ótti.

Ótken jılı eki el arasındaǵı tovar almasıwdıń kólemi 270 million dollardı quradı, usı jıldıń basınan bolsa 100 million dollardan astı. Jaqın jıllarda bul kórsetkishti 1 milliard dollarǵa jetkeriw, sawdadaǵı teńsalmaqlılıqtı saplastırıw, sanaat kórgizbelerin óz-ara ótkeriw arqalı eki mámleket arasında talap joqarı bolǵan ónimlerdi jetkerip beriw kólemin arttırıw boyınsha “jol kartası”n qabıl etiwge kelisip alındı.

Transport-tranzit tarawındaǵı birge islesiwdi bekkemlew, bul áhmiyetli jónelistiń potencialınan tolıq paydalanıw ushın qolaylı sharayatlar jaratıw máseleleri dodalandı.

Elimiz júklerin tasıwda Poti hám Batumi portlarınıń infrastrukturasınan jedel paydalanıw ilajlarına ayrıqsha itibar qaratıldı. Gruziyada logistika xabın, onda bolsa sanaat zonası hám Ózbekstan ónimleri ushın shourum shólkemlestiriw rejeleri qollap-quwatlandı.

Mámleketimiz basshısı “Baku – Tbilisi – Kars” temir jolınıń iske qosılǵanın qollap-quwatladı. Onı qurılıp atırǵan “Qıtay – Qırǵızstan – Ózbekstan” temir jol magistralı menen baylanıstırıw máselesin úyreniw usınıs etildi.

Sanaat kooperaciyası birge islesiwdiń ayrıqsha tiykarǵı baǵdarı sıpatında belgilendi. Kúni keshe ótkerilgen birgeliktegi biznes forumınıń nátiyjelerine joqarı baha berildi. Onıń juwmaqları boyınsha 2027-jılǵa shekem mólsherlengen Kooperaciya baǵdarlamasına qol qoyıldı.

Awıl xojalıǵı, elektrotexnika hám energetika tarmaqları, farmacevtika, azıq-awqat hám jeńil sanaat, qurılıs materialların islep shıǵarıw hám development, sanlastırıw, málimleme texnologiyaları, sanlı bank hám turizm tarawlarında jańa joybarlardı ámelge asırıw boyınsha kelisimlerge erisildi. Joybarlaw baslamaların qollap-quwatlaw ushın birgeliktegi Investiciyalıq fondtı shólkemlestiriw usınıs etildi.

Mádeniy-gumanitarlıq baylanıslar jedel keńeymekte. Usı jıldıń mart ayında Tashkent qalasında Gruziya mádeniyatı kúnleri tabıslı ótkerildi.

Ózbekstan Prezidenti Gruziya tárepine Tbilisidegi baǵlardan birine ullı shayır Áliysher Nawayı atın beriwge qarar etkeni ushın minnetdarshılıq bildirdi.

Usı jılı Ózbekstanda birgeliktegi bilimlendiriw hám turizm forumların ótkeriw rejelestirildi.

Sonday-aq, Ózbekstan Respublikasınıń Gruziyadaǵı elshixanasın shólkemlestiriw haqqında qarar qabıl etildi.

Sóylesiwler nátiyjesinde erisilgen kelisimlerdiń orınlanıwın támiyinlewge qaratılǵan birgeliktegi “jol kartası” tayarlanadı.

Bolıp ótken sóylesiwlerdiń juwmaǵında Ózbekstan Respublikası Prezidenti Shavkat Mirziyoev hám Gruziya Bas ministri Irakliy Kobaxidze Strategiyalıq sheriklik qatnasıqların ornatıw haqqındaǵı deklaraciyaǵa qol qoydı.

Sonday-aq, delegaciyalar basshılarınıń janında bir qatar eki tárepleme hújjetler almasıldı. Sonnan:

– Bajıxana jumıslarında birge islesiw hám óz-ara hákimshilik járdem haqqında kelisim;

– Málimleme-kommunikaciya texnologiyaları hám sanlastırıw tarawındaǵı birge islesiw haqqında kelisim;

– Kásiplik hám joqarı bilimlendiriw, ilim hám innovaciyalar tarawındaǵı birge islesiw haqqında kelisim;

– Ózbekstan Respublikası Húkimeti hám Gruziya Húkimeti arasında 2026-2027-jıllarǵa mólsherlengen birge islesiw baǵdarlaması;

– Ózbekstan Respublikası Mádeniyat ministrligi hám Gruziya Mádeniyat ministrligi arasında 2027-2030-jıllarǵa mólsherlengen birge islesiw baǵdarlaması;

– Ózbekstan Respublikası Ekonomika hám qarjı ministrligi menen Gruziya Qarjı ministrligi arasında óz-ara túsinisiw memorandumı;

– “E-Permit” ruqsatnamalar almasıwı málimleme sistemasın engiziw boyınsha birge islesiw haqqında memorandum;

– Awıl xojalıǵı tarawında óz-ara túsinisiw memorandumı;

– Qorshaǵan ortalıqtı qorǵaw tarawındaǵı birge islesiw haqqında memorandum;

– Densawlıqtı saqlaw tarawında óz-ara túsinisiw memorandumı;

– Radiaciyalıq qorǵaw hám yadrolıq qáwipsizlik máseleleri boyınsha birge islesiw hám málimleme almasıw haqqında memorandum;

– Miynet migraciyası tarawında óz-ara túsinisiw memorandumı;

– Turizm tarawındaǵı birge islesiw haqqında memorandum.

Sonday-aq, sapar sheńberinde Ózbekstan Respublikası Bas prokuraturası janındaǵı Májbúriy orınlaw byurosı menen Gruziya Ádillik ministrligi janındaǵı Milliy orınlaw byurosı arasında birge islesiw haqqındaǵı memorandumǵa qol qoyıldı.

Soń Ózbekstan Prezidenti Shavkat Mirziyoev hám Gruziya Bas ministri Irakliy Kobaxidze Tbilisi qalasında ózbek xalqınıń ullı perzenti, shayır hám oyshıl Áliysher Nawayı esteliginiń saltanatlı ashılıw máresiminde qatnastı.

Áliysher Nawayınıń miyrası tek ǵana ózbek xalqınıń emes, al pútkil insaniyattıń baylıǵı bolıp esaplanadı. Ómirdiń ózine tán enciklopediyasına aylanǵan házireti Nawayınıń shıǵarmaları kóplegen áwladlardı ilhamlandırıp kelmekte, izertlewshiler, ádebiyat ıqlasbentleri hám Shıǵıstıń bay ruwxıy dúnyasın tereńirek ańlamaqshı bolǵan barlıq insanlar ushın bilim deregi bolıp xızmet etpekte.

Tbilisi qalasında Áliysher Nawayı esteliginiń ashılıwı Ózbekstan menen Gruziya arasındaǵı mádeniy baylanıslar tariyxında jáne bir áhmietli waqıya boldı.

Xalıqlarımızdı ázelden sawda jolları, doslıq hám óz-ara húrmet baylanısları baylanıstırıp kelgen, bir-birimizdiń bay mádeniy miyrasımızǵa qızıǵıwshılıǵımız úlken.
Ózbekstanda ullı gruzin shayırı Shota Rustavelidiń dóretiwshiligin tereń húrmet etedi hám qádirleydi. Tashkenttiń oraylıq kóshelerinen biri onıń atı menen atalǵan, gruzin klassikalıq ádebiyatınıń ullı ǵayratkerine estelik ornatılǵan. Óz gezeginde, ótken jılı Tbilisidiń oraylıq baǵlarınan birine Áliysher Nawayı atı berildi.

Sońǵı jıllarda Ózbekstan menen Gruziya arasındaǵı mádeniy-gumanitarlıq birge islesiw jańa basqıshqa kóterildi. Tbilisi qalasında Ózbekstan mádeniyatı hám kino kúnleri, Tashkent qalasında bolsa Gruziya mádeniyatı kúnleri tabıslı ótkerildi.

Máresimde Áliysher Nawayı jáhán ádebiyatınıń ullı wákili ekeni, onıń biybaha dóretiwshiligi ásirler dawamında adamlardı insanıylıq, aǵartıwshılıq, pikirlew hám óz-ara húrmetke shaqırıp kiyatırǵanı atap ótildi.

Tbilisi qalasındaǵı Áliysher Nawayı esteligi Ózbekstan hám Gruziya xalıqları arasında bekkemlenip atırǵan doslıq baylanıslarınıń jáne bir ayqın belgisi bolatuǵınına isenim bildirildi.

Sonıń menen Ózbekstan Respublikası Prezidenti Shavkat Mirziyoevtiń Gruziyaǵa mámleketlik saparı sheńberindegi ilajlar juwmaqlandı. Shota Rustaveli atındaǵı xalıqaralıq aeroportta ullı mártebeli miymandı Gruziya Bas ministri Irakliy Kobaxidze shıǵarıp saldı.

ÓzA