AQSh, Meksika hám Kanada maydanlarında ótkerilip atırǵan futbol boyınsha jáhán chempionatında házirgi kúnleri 1/8 final oyınları qızǵın dawam etpekte.

Atap aytatuǵın bolsaq, chempionattıń bul basqıshında Afrika kontinetinen Marokko maydan iyeleri esaplanǵan Kanada saylandı komandasın 3:0 esabında jeńgen bolsa, ózbekstanlı referi Ilgiz Tantashev basqarǵan Franciya hám Paragvay arasındaǵı oyında ótken jáhán chempionatınıń gúmis medal iyeleri Kilian Mbappeniń urǵan golı esesine 1:0 esabında jeńiske eristi.

Al, bes márte jáhán chempionı ataǵın jeńip alǵan Braziliya saylandı komandası bolsa, óziniń ájayıp oyınları menen kópshilik futbol jankúyerleriniń kewlinen shıǵıp kiyatırǵan Norvegiya saylandı komandası menen ushırastı. Oǵada qızıqlı ótken oyında Evropa wákilleri hár tárepleme ústemlik etip, komanda jetekshisi Erling Xollandtıń Braziliya dárwazasına urǵan eki golı esesine 2:1 esabında jeńiske eristi.

Óz Watanında ótkerilip atırǵan bıyılǵı jáhán chempionatında óz aldına úlken maqsetlerdi qoyǵan Meksika bul basqıshta Tomas Tuxel basshılıǵındaǵı Angliya saylandı komandası menen ushırastı.

Oǵada keskin ótken oyınnıń 36-38-minutlarında Djud Bellingem Meksika dárwazasın anıq nıshanǵa alǵan bolsa, 42-minutta meksikalı Xulian Kinones oyındaǵı esaptı qısqartıwǵa eristi.

54-minutta angliyalı qorǵawshı Djarell Kuansa óz qarsılasına islegen qopallıǵı ushın bas tóreshi avstraliyalı Alireza Fagani tárepinen qızıl kartochka menen jazalandı. Bunnan keyin Angliya saylandı komandası tiykarǵı itibardı qorǵanıwǵa qaratıp, tek ǵana qarsı hújimlerden paydalanıwǵa háreket etti.

Usınday hújimlerdiń birin meksikalı dárwazaman toqtatıp qaldı hám bunıń ushın penalti menen jazalandı. Al, bul penaltidi bolsa, komanda sárdarı Xarri Keyn anıq ámelge asırıp, oyındaǵı esaptı 3:1 ge jetkerdi.

Bunnan soń meksikalılar da barlıq itibardı hújimge qarattı. Usınday hújimlerdiń birin 69-minutta Xarri Keyn járiyma maydanında qopallıq penen toqatıp qaldı hám bunıń ushın bas tóreshi penalti belgiledi. Bul penaltidi bolsa, Raul Ximenes anıq ámelge asırdı hám esaptı 3:2 ge alıp keldi.

Álbette, bul esap maydan iyelerin hesh qanaatlandırmas edi hám olar oyınnıń sońǵı sekundlarına shekem gol urıwǵa háreket etti. Biraq, oyında olar kútken nátiyje júz bermedi hám Xarri Keyn jetekshiligindegi Angliya sherek finalǵa shıqtı.

Solay etip, ótken oyınlardıń barlıǵında da Mbappe, Xolland, Bellingem hám Keyn sıyaqlı futbol juldızları qraslaslar dárwazasına gol urıp, óz komandaların alǵa qaray jetelemekte.

Búgin yarım aqshamda saat 00:00 de Ispaniya hám Krishtianu Ronaldu jetekshiligindegi Portugaliya saylandı komandaları arasında oyın bolıp ótedi.

Adilbay Orazov,
Qaraqalpaqstan xabar agentligi sholıwshısı