ÓzLiDeP Siyasiy Keńesi Atqarıw komitetiniń baslıǵı, Ózbekstan Respublikası Oliy Majlisi Nızamshılıq palatasındaǵı ÓzLiDeP frakciyasınıń basshısı, Ózbekstan fermerler keńesiniń baslıǵı Aktam Xaitov Nókis qalasınıń “Nawqanbaǵ” mákan puqaralar jıyınında boldı.

Ilaj dawamında máhállede jumıs alıp barıp atırǵan “jetilik” aǵzaları menen ushırasıw ótkerildi. Onda máhállede xalıqtıń mashqalaların óz waqtında anıqlaw hám sheshiw, sociallıq qorǵawǵa mútáj shańaraqlardı qollap-quwatlaw, jaslar hám hayal-qızlardıń bántligin támiyinlew, isbilermenlikti rawajlandırıw sonday-aq, máhálledegi sociallıq-ruwxıy ortalıqtı jáne de bekkemlew boyınsha ámelge asırılıp atırǵan jumıslar úyrenilip, ayrıqsha atap ótildi.

Sonday-aq, Aktam Xaitov máhálle baslıǵınıń baslaması hám puqaralardıń belsene qatnasıwı menen shólkemlestirilgen muzey menen tanıstı. Muzeyde qaraqalpaq xalqınıń bay tariyxı, milliy turmıs tárizi, áyyemgi úy-ruwzıgershilik buyımları, ónermentshilik úlgileri hám mádeniy miyrasın sáwlelendiriwshi eksponatlar jámlengen.

Atap ótilgenindey, bul muzey tek ǵana máhálle xalqın emes, al jas áwladtı milliy qádiriyatlarǵa húrmet ruwxında tárbiyalaw, tariyxıy miyrastı qásterlep saqlaw hám turizm potencialın arttırıwǵa xızmet etip atırǵan áhmiyetli ruwxıy orın esaplanadı.

Ilaj juwmaǵında máhállede ámelge asırılıp atırǵan iygilikli baslamalar, xalıqtıń awızbirshiligi hám puqaralardıń óz aymaǵın abadanlastırıwǵa qaratılǵan is-háreketleri joqarı bahalandı hám bunday unamlı tájiriybelerdi basqa máhállelerde de keńnen en jaydırıw áhmiyetli ekeni atap ótildi.

Qaraqalpaqstan xabar agentligi