Ózbekstan Respublikası Prezidenti tárepinen qol qoyılǵan ÓRN-1155-sanlı nızam menen mámleketlik satıp alıwlar tarawında bahalardıń tiykarsız arttırılıwınıń aldın alıw, byudjet qarjılarınan nátiyjeli paydalanıw hám korrupciyalıq qáwip-qáterlerdi azaytıwǵa qaratılǵan ózgerisler kirgizildi.

Atap aytqanda, “Mámleketlik satıp alıwlar haqqında”ǵı nızamnıń 33-statyasına kirgizilgen qosımshalarǵa muwapıq, mámleketlik satıp alıwlarda satıp alınatuǵın tovarlar hám xızmetlerdiń bahası menen olardıń ortasha bazar bahası arasındaǵı eń kóp jol qoyılatuǵın ayırmashılıqtı belgilew tártibi Ministrler Kabineti tárepinen belgilenedi. Endi mámleketlik buyırtpashılar mámleketlik satıp alıwlardı ámelge asırıwda baslanǵısh bahanı qáliplestiriw boyınsha belgilengen talaplarǵa ámel etiwi shárt.

Sonday-aq, Hákimshilik juwapkershilik haqqındaǵı kodekske kirgizilgen qosımshalarǵa muwapıq, mámleketlik satıp alıw predmetiniń baslanǵısh bahası hám onıń ortasha bazar bahası arasındaǵı jol qoyılatuǵın ayırmashılıqtıń eń kóp muǵdarına belgilengen talaptı buzıw lawazımlı shaxslarǵa bazalıq esaplaw muǵdarınıń 30 esesine shekemgi muǵdarda járiyma salıwǵa sebep boladı.

Bul huqıqbuzarlıq hákimshilik jaza qollanılǵannan keyin bir jıl dawamında qaytadan islengen bolsa, lawazımlı shaxslarǵa bazalıq esaplaw muǵdarınıń 30 esesinen 50 esesine shekemgi muǵdarda járiyma salınadı. Bul ózgerisler mámleketlik satıp alıwlarda baslanǵısh bahalardı bazar bahalarına sáykes hám tiykarlanǵan túrde qáliplestiriw, byudjet qarjılarınıń maqsetli jumsalıwın támiyinlew jáne satıp alıw processlerinde ashıq-aydınlıq hám juwapkershilikti kúsheytiwge xızmet etedi.

Nızamǵa muwapıq, mámleketlik satıp alıwlarda tovarlar hám xızmetlerdiń ortasha bazar bahasın anıqlaw, bahalar arasındaǵı eń joqarı jol qoyılatuǵın shegaranı belgilew jáne bul process ústinen qadaǵalawdı ámelge asırıw tártibi úsh ay múddette Ministrler Kabineti tárepinen islep shıǵıladı hám tastıyıqlanadı.

ÓzA