Prezidentimiz tárepinen alǵa qoyılǵan hám búgingi kúnde turaqlı ámelge asırılıp atırǵan “Hár piyshembi – Jaslar kúni” baslaması elimizde jaslar menen islesiwdiń pútkilley jańa, nátiyjeli hám mánzilli sistemasın qáliplestirmekte.

Bul baslama jaslardıń tek ǵana mashqalaların tıńlaw emes, al olardıń arzıw-niyetlerin júzege shıǵarıw, potencialın tolıq kórsetiwi ushın bekkem tiykar jaratpaqta.

Mine usınday iygilikli ilajlar sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonınıń bir topar jasları menen ushırastı.

Onda atap ótilgenindey, elimizde jaslardı hár tárepleme qollap-quwatlaw mámleketlik siyasattıń baslı baǵdarlarınıń biri esaplanadı.

Ótkerilgen ushırasıwda bul baǵdarda respublikamızda jaslarǵa jaratılıp atırǵan imkaniyatlar haqqında keń túrde atap ótilip, mine usınday imkaniyatlardan nátiyjeli paydalanıp, hár qıylı baǵdarlarda joqarı nátiyjelerge erisip atırǵan jaslardıń qatarı barǵan sayın kóbeyip atırǵanı ayrıqsha tilge alındı.

Ushırasıw dawamında bozatawlı jaslar da belsendilik kórsetip, ózlerin qızıqtırıp atırǵan máseleler, turmısta ushırasıp atırǵan mashqalalar hám alǵa qoyılıp atırǵan usınıs hám baslamaların tikkeley bildirdi. Atap aytqanda, jaslardı jumıs penen támiyinlew, isbilermenlikti jolǵa qoyıw, banklerdiń jeńilletilgen kreditlerinen paydalanıw, kásip-óner úyreniw hám bilimlendiriw tarawına tiyisli máseleler boyınsha ózleriniń pikir hám usınısların bildirdi.

Eń áhmiyetlisi, ushırasıwda bildirilgen hár bir máseleni respublikamız basshısı jeke ózi qadaǵalawǵa alıp, taraw juwapkerlerine olardı qısqa múddetlerde unamlı sheshiw boyınsha anıq tapsırmalar berdi.

Qaraqalpaqstan xabar agentligi